[A:134]
chos rje sku phreng bzhi pa grags pa 'od zer |
4. sku phreng bzhi pa lho kha ba grags pa 'od zer gyi lo rgyus ni | sprul sku 'di ni mdo khams lho phyogs 'ba' khog stod sde dge'i yul smad tshab tsha'i brgyud la wa shul gyi rus su 'khrungs | sku bltams pa'i de ma thag nas zhal gsung las | nga ni 'dzam thang rgyal ba seng ge'i sku skyes yin zhes gsung bzhin zhal 'dzum pa'i ngang spyan krig hrig krig gis byang phyogs la gzigs par mdzad ces grags | de nas lo shas song mtshams su de lugs kyi grags snyan 'dzam thang chos rje sgar gyis legs par gsan te drung dka' bzhi pa'i yang sprul gnyis pa rin chen dpal bzang sogs sku 'khor yongs rgyas rags bsdus bcas rdo gser shel gsum brgyud nas rim pas 'ba' li thang phyogs su mchog gi sprul sku bzhugs pa'i yul du phebs te dngos rdzas 'bul ba sogs dang bcas lhan rgyas zla gcig tsam bzhugs mthar sprul pa'i sku nyid sku dbon rab dkar sogs kyi phebs skyel bcas rim pas legs phebs mdzad nas 'dzi ka'i lha mo dar thang du slebs skabs bsu bkod rgya che ba'i sgo nas dpal 'dzam thang chos rje'i pho brang du khri ston legs rgya mdzad |
de nas rim par chos rje gzhon nu rgyal mtshan gyi yang sprul dam pa'i drung nas klog yig sogs rig gnas 'ga' la bslab sbyang mdzad | de rjes lo shas nas drung dka' bzhi pa'i yang sprul rin chen dpal bzang sogs kyi mdun nas so thar dge bsnyen sngon du 'gro ba'i rab byung dge tshul gyi sdom pa zhus | mtshan rgyal ba grags pa 'od zer du gsol | de nas bzung jo nang pa'i rang lugs kyi zab bka' dus 'khor gyi dbang lung man ngag bskyed rdzogs bcas dang gzhan yang rgyud sde du ma'i zab chos yun ring bar du nod cing | a rge'i sku skyes nyi ma 'od zer dpal gyi drung nas kyang blo sbyong | sdom gsum | spyod 'jug sogs sbyang brtson mi dman pa byas | de rjes mi ring bar jo nang rtag brtan nas rje btsun kun dga' snying po'i dngos slob mkhas grub blo gros rnam rgyal 'dzam thamg 'dir chags phebs mdzad nas gang drung du grags pa 'od zer khong gis gtsos a rge'i sku skyes dang | bla ma don yod dbon rab dkar sogs kyis zhus ngor tshe dbang | rta mgrin dbang | dus 'khor dbang chen yongs rdzogs | rdo rje'i rnal 'byor yan lag drug gi zab khrid rgyas pa bcas sngar dam po 'debs pa'i srol mi 'dug kyang 'di dus nas dam po'i lag len zhib par gnang sde tshul de ka ltar phyag bzhes gnad du khel nges mdzad | de min yang blo gros rnam rgyal gyi drung nas chos rje 'dis yi dam lha'i rjes gnang dang rdor 'phreng sogs rgyud sde mang po'i zab pa'i dbang bka' zhus shing | bsnyen rdzogs yang zhus sam snyam | de 'dra'i tshul gyis lo bcu gnyis bar gtsang blo gros rnam rgyal khams phyogs su bzhugs nas bstan 'gro'i don rgya cher mdzad rjes yar dbus gtsang du phebs so | |