[A:138] rdzogs sogs zab chos du ma gnang nas chos kyi rgyal por mnga' gsol te nyid kyi gzims khang pho brang du bzhugs su bcug nas khong gis bla mar bkur te dus 'khor dbang chen | sbyor drug gi zab khrid cha tshang | rin byung | rdor 'phreng | mi dra brgya rtsa | de nyid lnga pa sogs dbang lung man ngag ches mang po gsan |
go rgyal ba khong nyid kyis bzhugs gnas gsar pa zur du bzhengs nas der bzhugs bzhin shog khang chos grwa nas gtsang pa'i mdun du chos zhu ba dang | rang gi gzims khang du mtshams sgrub mdzad pa dus mnyam pa'i bkod pa cig char ba nye gnas dag gis bar bar mthong chos su gyur pa'i rnam par 'phrul ba dus dus su ston pa sogs mdzad bzang de 'dra'i ngang nas re zhig bar gnas mthar rnal 'byor gyi dbang phyug mtshungs med rin chen mnyam bzhag gi mdun drung nas rdo rje 'jigs byed kyi chos skor dbang lung man ngag spyi dang khyad par rwa ba'i snyan brgyud dang bsnyen chen gyi gdams pa sogs lha 'di'i zab khyad du ma go rgyal ba rang gis zhus pa bzhin gnang ste | chos rje khong gis de lugs bzhin bsnyen sgrub mdzad skabs bsnyen chen gyi rjes sna bya bzhad kyi sha ma rnyed pa la nyin gcig khong gi sgrub khang gi nyen skor du bya bshad cig 'ong nas shi ba'i ro rnyed pas rjes sna kha tshang ba byung zhing | de ltar dpal rdo rje 'jigs mdzad kyi bskyed rim sgrub pa rnam gsum la lan gsum yang bskyar mdzad de nan tan chen po'i sgo nas zla ba bco brgyad du bsnyen sgrub gzab ldan kha skong las bzhi'i sbyin sreg bcas mtha' rgyas 'grub rtags khyad par ba dang bskyed rim la ches gdengs tshad brnyes shing 'jam dpal gshin rje'i gshed kyi rdzogs rim spros bral rnal 'byor gsum gyi rim pas rlung sems kyi dwangs ma gnyug ma'i ye shes kyi rang mdangs las mkha' la skal tshogs ltar rtsol med rang shar gyi don dam zung 'jug nges pa don gyi 'jam dpal khro bo'i stong gzugs sgyu ma'i sku rim pas ji bzhin mngon du bya ba'i nye lam la dbang 'byor te mngon rtogs mchog gi rtser son |
'di skabs rjes thob thun mtshams kyi dus su khong nyid 'jigs byed rwa rtse la me 'bar ba'i sku dngos su bar bar nye gnas dag gis mthong nas 'jigs zil bzod dka' bas skrag 'jigs kyis sku mdun nas phyir 'bros pa yang mang du byung bar grags skad | de nas bzung 'dzam thang pa la rdo rje 'jigs byed kyi bka' babs par grags pa ltar don la'ang gnas shing nyid kyis hrI Sti dung phyur ljags bzlas mdzad pa dang spyir na'ang ma rungs 'tshe ba'i rigs kyi srog la mnga' dbang bsgyur zhing yang sgos su lho kha'i rgyal gdon gyi kha gnon du bzhugs pa'i lo rgyus yod pa ma zad nyid mnyam bzhag las thabs mi mkhas pas bslangs na tshe'i gegs su gyur cing | khong gi sgrub chas na bza' mthong tsam gyis kyang rgyal gdon 'gog par byed thub pa'i mthu nus che zhing | nyid kyi thugs slob yang bla ma seng ge rgyal