[A:171] thog ma ngag dbang rnam rgyal gang gi sku gong ma mkhas grub blo gros rnam rgyal dang nyid kyi khu bo cha lung grub chen ngag dbang 'phrin las dang | gtsang pa khong nyid dang gsum gyi lo rgyus chos 'byung gzhung du cha tshang nyud tsam re brjod zin cing de lhag gi gtsang pa'i sku phreng dang sgrub brgyud 'dzin pa'i rdo rje slob dpon gang dag gi lo rgyus mdo tsam re 'dir 'chad par bya ba la | thog mar sngon gyi dus na rgya gar 'phags pa'i yul du rgyal ba shAkya seng ges 'bras spungs mchod rten chen mor dus kyi 'khor lo'i rgyud sogs gsungs skabs kyi gsang chen rgyud sde mtha' dag zhu pa po gsang bdag rdo rje 'dzin pa'i rnam 'phrul chos rgyal zla ba bzang po | bcom ldan 'das nyid kyi nye gnas nyan thos chen po kun dga' bo | gangs ljongs su pad ma 'byung gnas kyi sku dus lo tsA bai ro tsa na | rje jo nang pa chen po'i bu chen zhang ston bsod nams grags pa | 'jam mgon kun dga' snying po'i dngos slob mkhas grub blo gros rnam rgyal rnams kyi sku'i rnam par rol pa rim pas legs par bzung ste bstan pa dang 'gro ba'i don rgya cher mdzad rjes su slar yang sprul pa'i sku'i rnam par dus mthar snyigs 'gro'i bsod nams kyi zhing du legs par byon te rang re'i nges don sgrub brgyud kyi bstan pa mdo smad du slar cher spel dar rgyas mdzad pa ni gtsang pa ngag dbang bstan 'dzin rnam rgyal te | gang nyid khams 'dzam thang du gdan 'dren skabs lam bar du a skyong dpon khag gis che bkur dang bcas dpal 'dzam thang du phebs te gyang ra khar chos gzhi rgya cher btsugs nas chos rje'i sprul dbon sogs 'dus sde ches mang la rang lugs kyi chos bka' zab mo'i sgo 'phar phyes nas smin grol la bkod pa nas bzung tsha rong rnga yul gser khog sogs yul gru rgya che ba du ma nges don zab mo'i chos mchog gis ches skal ba bzang po legs mdzad kyi mtshan snyan kun mkyen jo nang pa chen po slar yang byon pa lta bu'i byin rlabs kyi zil che ba sogs sgo gang thad nas ya mtshan bsngags par 'os pa mang po'i grags pa mdo khams su khyab par mdzad bzhin khong nyid kyis bstan 'gro'i legs sgo rgya cher spel te dgung grangs zhe brgyad tsam du slebs skabs ljongs 'di'i gdul bya re zhig rdzogs pa'i tshul gyis thugs dgongs 'od gsal gnas lugs kyi dbyings su ro gcig par gyur te gzugs sku'i bkod pa nyer bsdu byas shing nyid kyi slob tshogs mkhas btsun dar rgyas chos 'phel zung gis gtsos skyes chen du ma byon pa sogs ji bzhin chos 'byung gzhung gi nyid kyi rnam thar las ji skad byung ba ltar ro | |
gtsang ba sku phreng gnyis pa kun bzang 'phrin las rnam rgyal |
2. gtsang ba'i sku thog ma gang gi yang sprul sku phreng gnyis pa'i tshul ni sprul sku kun bzang 'phrin las rnam rgyal te rang gi sku gong ma'i rtsa ba'i bla ma kun bzang dbang po dang khu bo ngag dbang 'phrin las dang gong ma ngag dbang rnam rgyal gsum gyi mtshan gras nas ming gsol ba yin cing | de yang rgyal rong