[A:177] dga' ldan pa sogs la 'bul rkyen | jo bo sogs rten khyad 'phags la gser chab bcas paN chen rin po che'i mdun du dngos 'bul gzab ldan gyi sgo nas bsnyen rdzogs kyi sdom pa zhus shing | khong gis gtsang pa la gnang sbyin | rje'i gsung 'bum | byams mgon sku brnyan | paN chen blo bzang chos rgyan gyi gsung 'bum | na bza' cha tshang sogs dang | khyad par rje btsun nga 'dra ma'i gser sku | rje btsun gyi dbu zhwa | rje btsun nyid kyi sku 'dra'i spar shing phyag bzo ma sogs legs skyes kyi mdzad sgo rgya cher byas shing | jo nang rtag brtan gyi slob dpon sku phyogs spo ra ba blo bzang mthu stobs kyi drung nas zab lam nai gu'i chos bka' yongs rdzogs zhus nas yon 'bul dgon la spyi thebs gya nom dang sa skya sogs grub sde so sor mchod 'bul mi dman pa'i sgo nas rang gnas su 'byor zhing mtsho sngon phyogs kyi gtsang sgar du'ang phebs nas chos bkas 'gro don ci rigs mdzad |
dgung lo sum cu skor la thugs chen du gnas mjal dang naigu'i zab chos la nyams len nyer drug bar mdzad pas sngar las nyams dang rtogs pa'i rtsal 'bar te phyag rgya cher po'i don la dbang 'byor | 'di skor du gser rni zog dgon la rgyal gdon gyi gnod pa che stabs gtsang pa bsrung rim du byon dgos byung bas lam bar du se dmar zhes pa'i gzhi bdag gdug can khong nyid gshin rje'i gshed kyi rnam par bzhengs te stobs nus kyis ci dkar las la bkol nas bka' dam du legs bzhag mdzad cing gnod pa can gyi dgon der khams gsum zil gnon gyi gtor sgrub zab mo'i bsrung rim skabs dkyil 'khor du mtshon cha'i phur bu 'khrab pa dang zor cha phal cher dgung rtsed byed pa sogs ches rngam zhing 'jigs pa'i zil bzod dka' ba'i rtags mtshan dus su ngom bzhin dgon de la 'tshe ba'i rgyal gdon tshar bcad nas zhi 'jags bde skabs su btang zhing | rnam par dkar ba'i bya ba khong gis dngul rdo tshad bcu gcig gis yon sbyin mdzad de so mang rgyal khab nas 'khor brgya phrag lhag dang | yang dngul rdo tshad bcu gnyis lhag tsam gyis ra rgya shing za'i sgar nas rgyal ba'i bka' 'gyur ro cog gi yi ge yongs rdzogs gdan 'dren legs blus mdzad sgo dang | 'di skor byams gling du phebs te sgo mang 'jam dbyangs bzhad pa dang mjal 'phral bcas 'bul ba gzab ldan grwa tshang la mang ja sogs dang 'jigs med dbang po'i gsung 'bum zhig kyang blus | spyir gtsang pa 'di nyid kyis 'dzi ka stod smad kyi 'dus sde yongs la zab mo'i chos char phebs pa sogs mgo log | rnga ba | wa shul | tsha ko'i phyogs khag so sor zab chos kyis rjes su bzung ba'i slob ma ches mang zhing khyad par gang nyid kyi thugs sras bu chen du gyur pa rdo rje slob dpon gyi gnas su 'os pa brgya phrag du ma yod la | bstan pa'i sbyin bdag yang gong smos kyi yul gru so sor skyong ba'i mi dbang sde bcas gang dag dang gdul bya bstan 'gro'i don de phyogs kun tu snga phyi ci rigs mang por byon zhing | khong nyid ri khrod gdar tshang du 'jigs byed bsnyen mtshams la bzhugs