[A:218] mtsho bcas dang | gsang 'dus | sangs rgyas thod pa de nyid lnga pa | mnyam sbyor | rdo rje gdan bzhi | dgyes rdor | mahA ma ya | phur pa | gtum khro rnams dang | rnal 'byor ma sogs ma rgyud kyi dkyil 'khor drug dang | sbyong rgyud bcu gnyis | grub thob brgyad cu rnams dang | gshin rje'i rab 'byams kyi dkyil 'khor bdun | 'jigs byed bcu gsum ma | gshed nag bcu gsum ma | mtha' rten drag pa'am sgrol dbang bcas dang | 'jam dpal gsang ldan | gzungs grwa lnga'i bar gyi dbang bka' rang re'i dam pa gong ma'i thugs su bzhugs pa'i rgyud sde'i rigs ches mang po'i dbang bskur snga phyi ci rigs su ma gsan pa med pa lta bu yin zhing | shangs chos skor yang bla ma mchog gi drung du dbang khrid yongs rdzogs dam pa 'di la thob pa bzhin nyid kyis nyams len gnad smin kyang mdzad |
dgung lo zhe bzhi sogs su rjes dpal ldan bla ma'i zhal snga nas | nyid kyi mi 'khrugs pa'i dbang lung khrid dmigs kyi rim la legs zhu mdzad de bsnyen mtshams tshad ldan bcas legs grub mdzad cing | 'di skor gong 'og ci rigs su rab kha'i bla ma rtogs pa'i dbang phyug kun dga' mkhas grub dbang po'i drung du dam pa 'dis nyams len rtogs 'bul byas pas bla ma gang gi thugs dgyes tshor chen po dang bcas pas mgu ba rgya cher mdzad | rje bla ma chos 'byor rgya mtsho'i mdun nas gong smos bzhin gyi dbang bskur ci rigs re'i skabs shig dam pa 'dis rang la 'phar g.yo 'ong skabs zhal nas | khong nyid rngog ston pa chos sku rdo rje yin tshul gyi gsung gleng rang shugs kyis byung la | de ltar khong gis sbyor drug 'khrul 'khor skabs nas kyang 'phar g.yo 'ong dus bar bar rngog ston yin pa'i zhal gsung yang yang byung zhes grag | dam pa 'di sbyor drug tu bzhugs skabs su lan cig lha bzo bla ma rin po che phebs pa'i drung du nyid kyis rtogs 'bul nyams len zhu gtugs kyi dus su bla ma de nyid kyi zhal snga nas | dam pa 'di la khyed kyis nyin re bzhin mgon po'i skang bsdus gtum chen ma brgya phrag re 'chag med mdzad na nam zhig don chen po zhig 'ong tshul gyi bka' lung ba ltar rjes sor dam pa 'di nyid rdo rje slob dpon mchog tu gyur | de nas bar skabs shig tu khong gis bskyed rim bsnyen bzlas mdzad dus 'dzi nyin to tshe'i rgyal ngan bande'i gzugs su 'ong nas nyid kyi sgo rtsar thon pa na glang mgo can du gyur te rwa yis sgo brdung stangs byed skabs dam pa khong gis skad cig la rdo rje 'jigs mdzad chen po'i skur legs bzhengs kyis 'jigs gzugs cher ngom bzhin 'phar g.yo dang bcas kyis gnod byed rgyang ring du bskrad pas 'tshe ba spu tsam ma nus pa dang | gzhan yang gnod byed la dmigs med lta bas rgyas gtab byas te rang grol du song ba sogs de 'dra 'ga'i lo rgyus yod la | dam pa 'di nyid kyis bar skabs su bka' chos kyi zhal 'don mdzad pa sogs la dpag na rje bla ma chos 'byor zhabs pa'i drung du bka' 'gyur gyi bklag lung de yang khong gis gsan nam snyam |