[A:231] ma'i mdzes sku stong gzugs sgyu ma'i tshul gyis mjal te legs nyes lkog gyur gyi gnas 'ga' re ji bzhin gsung 'doms mdzad cing 'di skor ci rigs par rje bla ma ngag dbang bsod nams bzang po gang gi mdun nas nyid kyis sgrub thabs rin 'byung gi zab dbang yongs rdzogs kyang legs nod kyis thob la | skabs shig tu khong gi thugs snang du lte ba'i rtsa 'khor du rnal 'byor ma'i sku phra mo zhig 'khor lo ltar 'khor mo yug tu myur ba 'khor bas lus la bde nyams 'bar ba yang yang byung zhing rkyen des nyams 'ur nas lus 'khor ba dang bskyod pa sogs dbang med shugs 'byung gis byed pa dang nyams len gyi rtogs pa la'ang phan tshun 'gran pa lta bu'i ngang tshul gyis sgo kun nas na cher 'phel ba'i tshod du 'dug cing | khong gi nye 'khor na yod pa'i nad pa 'tsho 'chi ji ltar 'gyur gyi gnas tshul thugs kyis snga mor ji bzhin mkyen pa phyis thog khel du song ba dang khong dang thag ring gi yul la yod pa'i nad pa zhig gzhan dag gis 'chi nges par red zer skabs nad pa kho rang gi snang ngor rje dam pa 'di nyid zhal mjal ba'i tshul gyis bka'lung las | khyed kyis bsnyen kha ma gang bar mi 'chi ba'i zhal gsung gsal po byung ba ltar phyis su de lugs ltar gyur pa sogs kyis mtshon de 'dra'i lo rgyus du ma yod do | |
dgung lo bzhi bcu'i skor zhig nas bar bar du nyid kyi thugs snang la dus 'khor rdzogs rim sbyor drug gi rjes dran dang bde mchog rim lnga sogs kyi sgyu lus kyi nyams khong gi rang lus gdos byas bem po'i snang cha dbyings su yal nas dpal ldan bde ba mchog gi sgyu ma'i sku dbu 'bum phyag 'bum gyi rnam pa phyi nang rim pa lnga las nang ma ches gsal zhing dwangs pa'i bdag nyid dang phyi ma rnams rim pas je mi gsal du song ba zhig tu gyur te bar bar rnams su sku lus stong gzugs kyi rnam pa mos btags la ltos pa med phyogs mtshams kun tu phar spro zhing tshur bsdu ba'i rnam pa res mos kyi snang tshul ya mtshan pa yang yang byung ba'i tha mal gyi snang ba dag snang rgyan gyi 'khor lo mchog tu shar ba'i dbu tshugs pa nas bzung sngags kyi rdo rje 'dzin pa nges pa don gyi bshes gnyen deng dus su zla bral gyi go 'phang la nye bar son zhing | 'di skor khong nyid 'dzam ngos rdo rje 'chang gi sku mdun du bar bar phebs te nyams len la 'dri gtugs chen po yang yang byed pa dang sngar sgrub grwar bzhugs nas rje de nyid kyi drung du chos bka' ci dgos nyid nas gsan zhing rtogs 'bul kyang yang yang zhu ba phul bas thugs yid gcig 'dres su gyur te rje dam pa'i thugs sras che bsngags kyi mdzad sgo can du dam pa 'di nyid legs gyur gyi ngos nas sngon byon kun mkhyen jo nang pa chen po'i thugs sras mchog gyur jo nang lo tsA ba zhes grags pa ste mtshan dngos skad gnyis legs smra rje blo gros dpal dang | rdzogs chen snying thig gi grub chen po rdo bla kun bzang gzhan phan gyi rdo rje'i mtshan can slob chen rnam bzhi'i ya gyal ras pa dam tshig rdo rje dang | 'dzam thang