[A:16] rgyal po la sogs pa stong phrag lngas gnas lugs kyi don mngon sum du mthong | lus kyang rig pa 'dzin par gyur nas rdzu 'phrul gyi nam mkha' la 'gro zhing mthar gyis mi snang bar gyur skad | gzhan yang phyag rgya chen po sems rnal du mtshon pa ni brgya stong du ma zhig byung bas phyogs thams cad du grags pas khyab cing | 'gro ba mang po'i don mdzad nas sku lus de nyid kyis sangs rgyas kyi zhing gzhan du bzhud do | |
2. de nas 'phags pa klu sgrub bram ze'i rigs su lho phyogs baidarbhar sku 'khrungs pa de ni 'di'i slob ma ste | de yang chung ngu lo bdun la slebs su nye ba'i skabs na sku tshe'i gegs shin tu che stabs pha mas de ma bzod nas g.yog dang bcas yul gzhan du 'khyam du btang bas mthar nAlendrar slebs | der mkhan po sgra gcan 'dzin bzhugs pas des sku tshe'i gegs bsal der rab tu byung | theg pa che chung gi sde snod mtha' dag dang | rig pa'i gnas gang yang mi mkhyen pa med par byas | de nas rma bya chen mo sogs kyi rig sngags sgrubs pas | ri lu mig sman sogs kyi dngos grub mang po dang | tshar gtsod slar gso la sogs pa'i nus pa thams cad grub | mi ma yin thams cad mngag gzhug du song | khyad par bcud len grub pas rdo rje'i skur gyur | rdzu 'phrul dang mngon shes chen por gyur skad | de nas rig sngags kyi mthu sogs kyis sngags kyi zhing gzhan du byon nas ye shes kyi mkha' 'gro rnams las gdams pa thob | rgyud dang sgrub thabs mang po spyan drangs | klu dang mi'i don rgya che ba la dgongs nas re zhig klu yul du byon nas sher phyin 'bum pa sogs spyan drangs | de nas bka' bar tha'i dgongs pa gtso bor 'grel byed kyi bstan bcos dbu ma rig tshogs dang bstod tshogs sogs kyang brtsams pas gnas lugs mthar thug don dam pa'i ye shes chos skur gtan la phabs | de sogs bstan pa la bya ba rgya cher byas | phyis dpal gyi rir lo nyis brgya tsam gnod sbyin mo rnams kyi 'khor dang bcas te sngags kyi spyod pas bzhugs | mtshan bzang so gnyis sku la 'grub | mthar dbu sbyin pa btang rkyen gyis phyed lo drug brgyar don gcig gis ma tshang skad |
3. de'i slob ma grub chen shAbAri gar mkhan gyi rigs su 'khrungs te slob dpon la bde mchog gi dbang bskur zhus nas bsgoms pas snying po'i don mngon du gyur byang sems blo gros rin chen gyi zhal mthong mthar zung 'jug grub nas lho phyogs kyi ri la ri dwags bshor ba ltar gyis 'gro don mdzad do | | de nas rim par gsang sngags kyi lam la spyod pa'i grub dbang du mas kyang rang byung lhan skyes ye shes mngon du byas pa yin la | gzhan yang klu sgrub yab sras kyi dus snga phyi ci rigs su gsang sngags kyi lam la brten nas skye bo stong phrag tu bcad pa brgyas rig pa 'dzin pa grub cing | de 'dra'i rigs mang po yod pa dag kyang shin tu sgam zhing gsang ba bsrung ba yin phyir rig pa 'dzin pa ma grub kyi bar du sus kyang mi shes pas slob dpon gyis slob ma la brgyud rim gyis 'doms pa'ang cung zad las med la |