[A:240] gnang byung zhing nyin cig rje bka' drin can gyis slob bu nyid la sems khrid cig mdzad skabs skad cig de nyid la slob bu rang gi sems gshis sngar dang mi 'dra bar sems rang gsal gyis bde gsal mi rtog pa'i brtan cha de ka nyid rnam shes kyi shin sbubs gsar pa las grol te rang dwangs gshis bcos gzhig dang bral ba g.ya' dag nam mkha' ches gsal gyi mdangs ltar kun nas gsal ba'i rang bzhin sngar mthong ma myong ba zhig rjen gyis shar nas ngang de ka la reb tsam gnas pa zhig byung | de phan chad nas gnyug sems kyi rang ngo legs par zin te mnyam bzhag skabs su bar bar de'i ngang du sdod thub pa byung zhing tshul de bla ma mchog la nyid kyis zhus pa na rje gcig chog rgyal po'i bka' lung gis | dam pa 'di la gnyug sems 'od gsal gsang sngags kyi rtags pa slad med cig gi cha shas tsam mngon pa yin pas rang sa 'di'i steng nas zin pa gal che phar phar gnas lugs kyi mnyam bzhag je 'thug tu 'gro ba yin no | | zhes gsungs pa bzhin slob bu dam pas nyams len mdzad pas bar skabs rer mnyam bzhag dus su rje 'dzam ngos rdo rje 'chang stong gzugs sgyu ma'i rnam par shar te zhal nas gsung mgur kyis sems gnas lugs kyi rang ngo sprad pa dang dus bar kun tu rdo rje 'chang de nyid 'ja' zer gyi rnam pa'i sbubs su stong gzugs kyi tshul du yang yang mthong zhing mnyam bzhag gshis kyi yin lugs ji bzhin ston pa dang bar skabs mnyam bzhag de las ldang bskul sogs dag snang sgyu ma'i ngo bor nges pa don gyi dge ba'i bshes gnyen gyi mdzad chen zla dang bral ba legs gnang gis skal ldan slob bu'i rgyud nye bar smin mdzad kyi bka' drin gsum ldan rje gcig chog rgyal po ni mtshungs zla dang bral ba'i skyabs mchog ngag gi dbang po kho na ste | rje gang 'di dam pa thugs slob nyid la gzhan su las bka' drin gzhal du med cing | de'i byin rlabs kyis mtshams 'di zhig nas slob bu 'di'i nyams snang ngor dus kyi 'khor lo lhan skyes kyi gzigs snang dang kun mkhyen jo nang pa chen po dang | skyabs rje mkhar ba rnams kyi zhal gzigs stong gzugs kyi rnam par shar ba yang yang byung | bar skabs rer de 'dra'i tshul gyis rje 'dzam ngos rin po che nyid byon te nyams len 'dri gtugs yang yang gi skal ba 'grig stabs tha mal 'di snang zhal mjal gyis nyams len rtsar gcod kyi ngal ba mi dgos pa'i tshod tsam du 'dug | 'di skor rje bla ma sku dngos zhal bzhugs kyi skabs su khong gi drung du yod pa'i slob tshogs gang dag las rdo rje'i slob ma 'di nyid rje rang gi khong la nyer mkho'i rim gro byed mkhan mchog dang khong nyid gnas skabs 'phral bde'i rkyen du gyur pa sogs kyi che bsngags rgya che ba yang yang mdzad la | slob bu dam pa na chung gi skabs nas kyang sngon gnas 'brim shar ri khrod du sgrub tshugs bzung myong ba'i snang ba wal wal 'char ba yod cing | de lugs ltar rje 'dzam ngos skyabs mgon gyis kyang khong gi rtsa ba'i bla ma sog po kun grol zhabs pa'i sku skyes su dam pa 'di nyid zhal bzhes yang yang gi bka' gnang nges par byung zhing de 'dra'i tshul gyis dgung lo nyer lnga