[A:19] brgyud rim 'di yan mdo tsam ste rgyas par dus 'khor chos 'byung ltar ro | | kun spang pa chen po man chad rjes nas 'og tu 'chad do | |
smras pa | gsang chen chos nyid 'od gsal dwangs pa'i dbyings | | sku dang ye shes rgya mtsho'i rtsal rab rdzogs | | rnam kun spros bral snang ba mchog ldan pa | | gang 'di so so rang rig kho na'i yul | | zhes pa bar skabs kyi tshigs su bcad pa'o | |
le'u gnyis pa | jo nang pa'i lugs bod du ji ltar byung tshul |
gnyis pa bod du ji ltar byung ba'i tshul la | stod dbus gtsang du thog mar ji ltar byung tshul dang | smad mdo khams su rjes nas byung tshul lo | |
dang po | stod dbus gtsang du thog mar ji ltar byung tshul |
dang po dpal jo nang pa'i sgrub gnas kyi che ba dang | der rang lugs 'dzin pa ji ltar byung tshul gnyis las |
1. dpal jo nang pa'i sgrub gnas kyi che ba |
dang po ni | gsang can ljongs 'di'i lte ba sa'i thig le | ri bo stong phrag du ma'i dbus na mngon par 'phags pa | sa 'dzin dbang po gnas rgyal dpal gyi ri | ru lag g.yas ru'i so mtshams phyi ltar gnas mchog bya rgod spungs ri | nang ltar pho brang ri bo poTala | gsang ba ltar na byang phyogs shambhala | de kho na nyid ltar na dpal ldan 'bras spungs chos dbyings gsung gi dbang phyug gi dkyil 'khor | don dam ye shes sangs rgyas seng ge'i khrir bzhugs e waM zung 'jug gi ngo bo sgrub gnas byed ba phrag brgya'i dbus na lhun po ltar mngon par mtho zhing | grags pa nyi zla ltar gsal ba ri 'khrod chen po jo nang zhes yongs su grags pa 'di'i gnas kyi che ba | sa gzhi la rang bzhin gyis grub pa'i yon tan yang lha dang drang srong rig 'dzin rnams kyis nyer bsten ri'i rgyal po'i dpal yon 'dus pa | rtsa brtan dbyibs legs sman ljongs nags tshal gyis brgyan pa | yid du 'ong ba'i 'bras bu g.yur za ba'i ljon pa dang | dri ngad kyis phyogs kun 'gengs shing | char sprin dang 'babs chu yid du 'ong ba | ri dwags dang 'dab chags sna tshogs kyis mdzes pa phyogs mtshams 'khor yug sgrub gnas dang chos grwa rgyas pa phyi