[A:271]
dgung lo zhe gnyis song skor nas gsang ba rtul zhugs mchog grub pa'i mnyam med gu ru pad 'byung gis nang gsang chen bde ba'i ye shes cher spel gyi rkyen mkha' 'gro'i las rgya gzungs ma nyer bsten gyi ngang nas phyi tshul ngur smrig rtags mtshan nye bar 'chang ba'i mdzad sgo gnang ba ltar deng dus la ltos na nang rtogs rtsa thig rlung gsum pa dbang thob cing phyi yul 'dre sogs kyi gnod sems dbang bsgyur re sha za'i rigs kyi gtso mo la las rgya'i gdul zhing du gzigs pa legs pa'i rkyen la nye bar brten nas se sprul zhes pa'i mtshan 'chang ba gang gis phyi ngur smrig gi rtags dang bcas nang gsang chen bde ba'i ye shes cher spel gyi byed rkyen rang gi lha 'bangs nye ba na gtogs pa'i mi mo yul sde gang dag gis ches 'dre mi bsrin sha za mo'i rigs ngan par brtsi ba'i bud med rig skyid ces pa snga phyi kun la yum du bzhes shing phyi so thar gyi sdom pa nyams med zil gyis gnon bzhin nang gsang chen dga' bzhi'i bde ba la rig ma mtshan ldan dang snyoms par 'jug pa'i sgo nas thabs mchog sngags kyi dam tshig las mi 'da' ba'i gsang lam nyer bgrod grub dbang gong ma dag gi rjes su bsnyegs tshul dang | da lan mtsho gter sogs gter kha 'ga' 'dir las 'phro med kyang nam zhig skye ba gsum nas skal ba yod tshul sogs kyi gsang ba'i rnam par thar pa nyung gsal sngags 'chang sprul sku nyid kyis gsung rtsom gnang ba dus bar tsam na cha tshang bzhugs mod re zhig nas dpe rgyun chad song ba sogs tshul de 'dra'i sgo nas dgung lo bzhi bcu'i skor kha tshang gi ring la khong gis gtsang pa'i gdan sa legs par skyong bzhin snga phyi ci rigs par gtsang pa'i gzims khang pho brang gi phyogs gcig gzhi nas gsar bzhengs dang dge 'dun 'du gnas lha khang ka ba dgu ma'i nang ris shing tshon sogs mkho 'os dus su gang babs dag bya ba las kyi bgyi ba sgo kun nas mi dman pa dang bcas legs bzhugs mdzad skabs sngar yum de nyid kun la gnod pa'i mo 'dre cher grags kyang rjes 'di skor nas bzung mkha' 'gro'i rigs tsam las mi snyan pa'i grags pa zhi ba legs pa'i mdzad sgo'am dgos pa 'ga' re yang bsnyon med du kun la mthong chos su gyur cing gtTang? sprul 'di nyid la sngon skyes rabs khro thung gi lo rgyus ltar 'dir yang bar 'ga' mtho zhing bar 'ga' dma' ba sogs phyi nang thams cad kyis bstod smad res mos kyi gnas su yang yang gyur pa lags kyang don gyi gnas tshod du skye ba dang nang rtogs gzhan rang ga su las mngon par mtho tshul khong gi rtsa ba'i bla ma rnam gnyis dang rje ngag dbang tshogs gnyis rgya mtsho sogs rang re'i dam pa mang po dang mgar klong gter ston dang a gter dpa' bo chos dbyings rdo rje sogs gzhan rnying phyogs kyi skyes chen rdo rje'i mngon shes mnga' ba du mas mgrin gcig tu zhal mthun sgo nas yang yang gsungs pa ma zad rje sprul pa'i sku rang gi nye 'khor du bcar sdod dag gis yang myong bas grub nus kyi yid ches pher ba'i yon tan gyi mdzad sgo mang tsam zhig kyang nges par mnga' ba'o | |