[A:291] bla ma mchog sgrub | lha bzo bla ma thabs mkhas | dmar rtsa bla ma don bzang sogs la'ang sbyor drug gi khrid yongs rdzogs rim pas gsungs te legs skyong mdzad cing khong gis slob tshogs la chos dang mthun pa'i gtam 'ba' zhig las don med kyi kyal ka ngag 'khyul gang yang mi gsung bar sku btsun zhing thugs sgam pa'i rang bzhin du bzhugs pas nye 'khor ba dag gis yang lkog g.yos nyes pa byed mi spobs la byas na thugs mngon shes kyis ji bzhin gzigs pas mtshang nas rgol zhing de kun zil gyis gnon pa'i dge ba'i bshes gnyen khyad 'phags sngags kyi rdo rje 'dzin pa chen po ste | khong gi thugs rgyud du lam rim gnyis kyi rtogs pa gang 'khrungs dag ni de dus su sgo kun nas lam rtogs pa nar son zhing rgyud las bstan pa'i lam dngos dang ches nye ba'i dbang gis deng dus su byon pa'i dam pa dag gi thugs nyams dang ltos na rnam pa phyogs re tsam 'dra mang na don gyi gnas tshod rtogs pa dngos rjes mthun pa'i khyad chos yod par mngon no | |
dgung lo don gcig par dge bshes mkhas btsun zhes pa dgun khar mgon po'i dbang khrid zhu bar phebs skabs dbang khrid gsung dus su nam mkhar sprin nag rba klong 'khrigs shing glog dang 'brug sgra char drag sogs mtshams rngam che bar byung zhing dge bshes kyis der bsnyen sgrub mdzad pas nad gdon gyi nyer 'tshe che ba rang zhir song | rdo lung bla ma rab rgyas | ri 'phongs bla ma chos rab sogs la sbyor drug gi khrid gsungs shing skabs 'gar tshogs chos bden bzhi gsal ba dang | lam rim sogs kyi bshad khrid kyang gnang | gzhan yang chos gtam kho nas slob tshogs kyi sems rgyud legs bcos yang yang mdzad cing 'di dus su khong la bser gyi rgyal gdon 'khu bas gnod 'tshe rtsom yang thugs dgongs bdag 'dzin med pa'i dbyings su mnyam par bzhag pas gnod pa spu tsam ma nus | bka' brgyud pa'i bstan bdag mchog sprul nges don chos kyi nyi ma yang 'di skor nas phebs te dam pa gang nyid gtsug gis bla mar bkur nas chos bka' zhu ba dang rtogs 'bul la de lugs kyi chos dang ngo sprod zab mo mdzad | rdzogs chen dpal sprul yang lan snga phyi gnyis khong gi mdun du byon pa'i rting mar sbyor drug gi khrid cha lag bcas yongs rdzogs zhus te thugs yid lhag par ches pa byung |
dgung lo don gsum skor sbyangs pa bla ma nges don | bla ma kar dbang | sman pa bla ma dpal mchog sogs la sbyor drug gnang | yang bar skabs su khong gis kun mkhyen rin po ches nye gnas sangs rin la gdams pa'i gsung mgur dbyangs su 'then cing | bar 'ga' rer zhal nas 'di skad | pha rdo rje 'chang gi bka' drin gyis | | dus 'dir yang nyams rtogs la bogs re byung | | sems 'dzin med bde ba chen po la | | dus 'gog med du gnas pa'i rnal 'byor bde | | zhes gsungs nas bzhugs 'dug |