[A:294] sgrol bar dam bcas na khyed cag lta ci smos | zhes sogs kyis zhal bzhes dang | da ni rang 'chi khar ma 'grub bsam pa ci yang med par dga' lhang nge ba'i 'gro chog tshul sogs kyang zhib rgyas su gsungs | de nas zhag 'ga' song ba na khong gi zhal nas | da ni rang snang la mngon dga'i zhing khams sogs kyang rgyun mi chad par mthong gin 'dug | mkha' dbyings su dpa' bo mkha' 'gro mang pos gang 'dug pas kho bos chos skyong rnams brtan bzhugs gshegs gsol gang byed gsungs | slob tshogs kyis ri khrod 'dir ni gshegs gsol byas na dga'am zhus | de lugs ltar khong nas gtang rag gsol mchod 'phrin las bcol te gshegs su gsol bar mdzad | de'i grags pa phyogs su khyab pas nyin re bzhin mjal ba brgya phrag mang po slebs pa dag la gang 'tshams kyi chos sbyin zab mos rang rang gi re 'dod legs skong mdzad | de nas lo de'i zla ba bdun pa'i yar tshes bco lnga'i nyi shar la chos gos kyis sku lus dkris te dbu byang du phyogs nas seng ge'i nyal stabs su bzhugs bum can gyi rlung khug bzung ste lan gsum bus mthar thugs dgongs chos dbyings su thim | zhag bdun thugs dam la bzhugs ring sku bkrag mdangs rgyas shing nam mkha' g.ya' dag me tog gi char bsnyon med du bab cing de'i mthar kun da sna sgor 'o ma lud pa bzhin thon nas bla ma 'jam dbyangs kyis thugs dam bkrol skabs mtshan mo nyi ma'i dkyil 'khor lta bu'i gsal 'tsher ba'i 'od snang mkha' lam nas shar te nam langs pa ltar re zhig gi bar du gyur pa kun gyis mthong lam du ches mngon pa sogs ngo mtshar ba'i legs mtshan du ma byung | de nas slob bu gang dag gis sku gdung la longs sku'i chas gsol te mchod smon rgya cher bsgrubs rjes zla ba brgyad pa'i tshes gsum nyin gdung la zhugs mchod phul bas myur du zhi zhing thugs dang dbu klad ma tshig par lus | de nas chos rje mchog sprul gyis gdung rten byang chub mchod rten dngul zangs las legs bskrun mdzad pa sogs bsod nams zhing mchog khyad par ba'i bgyi ba don ldan legs nges kyis mdzad sgo nye bar mthar phyin par gyur to | |
dam pa gang de'i brgyud 'dzin thugs sras che ba'i rim pa yang gong smos dag gis phyogs tsam go nus la rgyas pa'i rnam thar ni logs na yod pa ltar las 'dir mdo tsam brjod pa yin la | dam pa 'di nyid gtsang pa'i dngos slob de ltar yin zhing khong gis zab chos zhu yul gnyis pa paN chen dus zhabs pa'i byin gyis rlabs pa'i rnam 'phrul du grags pa gzhan sems thogs med du mkhyen zhing rlung la rang dbang thob ste 'byung 'jug sor rtse sogs gang 'dod byed nus pa stong nyid kyi lta ba rtogs shing 'khrul 'dzin gyi mdud pa lhod pa rnal 'byor gyi dbang phyug chen po lha tshe bla ma rgyal mtshan gang de ni rab byung bcu gnyis pa la lo nga gnyis song ba'i sa lug la 'khrungs | nyid dgung lo bcu gnyis lon tshe tsha ko'i phun tshogs rdzong rgyal khab tu gtsang jo nang rtag brtan dgon gyi bla ma gong bla kun dga' rnam rgyal zhabs