[A:27] yang tsha lhag pa byung | da lta bzang ldan gong mar chos 'chad | ma 'ongs pa na bar mar mchod rten bzhengs lung bstan pa ltar | gdan sar phebs nas lo shas nas sku 'bum chen mo'i rmang 'dings pa dang bzang ldan gong gi chos khrir bzhugs | bshes gnyen dam pa bcu lhag la snying po'i mdo bcu'i bshad pa rang bzhed rtsal du bton nas rgyas par gsungs | gzhan stong ston pa'i gsung rab than thun kyang mang du mdzad dpe rnams dang chos skad phyogs thams cad du khyab pas mkhas pa phal gyi blor ma shong dgongs du 'bel gtam rtsod pa zhus pa rnams rgya mtsho la kha ba bab pa bzhin du song bas dgongs su mjal ba rnams grub mtha' la nges shes dang bla ma la dad pa thob pa sha stag byung | ring nas ngag lon dang rtsod yig bskur ba rnams la chos dang mthun pa'i lan mdzad pas nges pa rnyed | phyis grub mtha' de rtsod bral du song nas phyogs bzhi'i dge bshes du mas bskul nas nges don rgya mtsho sogs grub mtha'i chos bcu drug | dus 'khor sa bcad sogs dus 'khor cha lag bco brgyad | yum gyi mchan bu | gsol 'debs nyer lnga | thogs rje chen po'i chos skor nyer gsum | bstod skor bcu bzhi | sku 'bum chen po'i chos skor lnga | rdo rje 'phreng ba dbang skor gsum | spring yig brgyad | smon lam gsum | bkra shis bzhi sogs snga phyi kun tu gsung rab kyi yig cha mang po mdzad pas thub bstan spyi dang nges don dbu ma chen mo mdo sngags kyi gnas lugs mthar thug tu lung rigs dri ma med pas gtan la phabs te rgyu dang 'bras bu'i theg pa'i chos sgo mtha' dag gsal bar byas | mchod rten chen mo bzhengs pa'i tshe srog chags shin tu mang ba la ljags sngags mdzad se gol gtogs pas srog chags gcig kyang med par song zhing | nam mkha' la 'ja' 'od kyis khengs | chu med pa la bca' lung gi phu chu nar gyis thon | gzhal yas khang gi thog phibs dang gdugs kyi thog phibs kyang nyi ma re re kho na la khel | rlung shin tu che ba dang char zhod che ba byung res la bden stobs brjod pas 'phral nyid du zhi ba kho na byung | chos khri'i khar chos gsung ba dang bzo bo rnams kyi sar bkod pa mdzad pa dang gzims chung du thugs dam la bzhugs pa sogs sku lus kyi bkod pa gsum gsum dus gcig tu byung ba ni mang pos yang yang mthong | sku'i bkod pa brgyad dus gcig tu byung ba yang 'kha' res mthong | mi dang mi ma yin gyis mchod rten chen mo bzhengs pa'i cha rkyen 'bul zhing las ka la rem pas ngo mtshar 'phrul gyis phyi nang gi bkod pa yongs rdzogs dka' ngal med pas grub cing dge mtshan legs pa'i ltas bzang kun gyi mngon gyur mtha' yas pa dang bcas rab gnas mtha' rgyas dga' ston gyi sgo nas bsod nams kyi zhing dam pa nye bar bzhengs te | snga phyi jo nang dang | phug mo chos rdzong dang | spyi bar phug gi brag ngos mis ye ma thar ba mang por yud kyis phebs nas mchod rten mang po bzhengs | la la da lta yang snang | thog ma jo nang du phebs pa'i skabs nyid jo mda' nas yar phebs pas nam mkha' la dus kyi 'khor lo'i dkyil 'khor