[A:401] reb tsam bzhugs dus 'khor nyid thog mar thugs mnyam bzhag la dar cig bzhugs mthar | zhal nas | de ring lta bu'i snang ba bde mo tshe gang bo la dkon pa ltar 'dug da ni rang gi lus 'di nyid dus kyi 'khor lo'i drug brgya so drug gi lha sku'i rnam pa dang ngag gi brjod pa gang dag lha mo sna tshogs de dag gi bsung gzhom med na da'i sgra dbangs rnam kun pa dang yid shes dran rig rnam pa mchog ldan 'gag med kyi dbyings spros bral 'gyur med bde chen dag mnyam 'ba' zhig pa las tha mal gyi snang ba mtha' dag gshis na mi 'dug pa lta bu der song bas khyod kyis nga la legs par ltos dang dus kyi 'khor lo'i gsang gsum gyi che ba 'di lta bu zhig go | | zhes gsungs nas de phan nyid kyis chang dang sgog pa ji ltar gsol yang dri ngan gang yang med par dri bzang po'i ngad kyis phyogs kun khyab cing khyad par dri chu dri chen yang dri bzang po can kho nar gyur te dri chen gyi mdog kyang ser po gser tsha can dri bzang po'i ngad 'thul ba'i ril bu 'ba' zhig bar bar byung zhing de dag bum rdzas dang myong reg sogs su dad can so sos legs bsdu byas |
de mtshams shig nas rdo rje 'chang chen po gang nyid kyi thugs dgongs chos kyi dbyings dang mi gnyis pa'i tshul gis mnyam rjes cha mi phyed pa can du gyur te sku g.yo med kyi ngang gsung lan 'ga' las mi 'byon pa lta bu zhig tu red song | de dus su bla ma blo 'phel gyis bzhugs zhus phul bas khong gis bzhugs pa zhal gyis bzhes pas de phan chad lo ngo gsum tsam la mnyam rjes dbyer med de 'dra'i sgo nas legs bzhugs kyang mdzad | de skabs kun tu thog mar sku g.yo 'gul dang bkres skom gang yang med par spyod pa shugs 'byung gis sngar gyi sku spyod dang ye mi 'dra ba'i ma bcos de ka nyid du legs bzhugs mdzad cing | bar 'ga' zhal nas | ye shes snang ba lam me ba | zhes gsung dus sku nyi ma'i zer la spyan 'dren pa dang | shugs chen mgyogs pa chen po ste | | zhes zhal gsung mdzad dus gsang chab bzed pa sogs sku g.yog ji ltar 'cham pa ltar byas te bzhugs skabs sku mdun du | lha tshe skyabs mgon dang | 'ba' mda' bla ma gnyis byon nas bzhugs zhus legs 'bul mdzad phyin khong gis zhal zas bza' btung ci drangs kyang mi gsol ba med pa gtan ma drangs kyang bkres skom gang yang med par sku gzi brjid dang ldan pa sku gzims bzhengs ji ltar byed du bcug kyang de ka ltar kho na las g.yo 'gul mi byed par rgyun bzhugs mdzad pa zhig tu gyur la | sngar 'ba' mda' bla ma thog mar sku mdun du thon ma thag la nyid kyis zhal gsung zhig kyang gnang ste | dge legs nga ni 'di 'dra zhig tu red song | zhes gsung tshe 'ba' mda' bla ma nyid kyi thugs dad gus shugs drag pos gting nas bskyed de gus pas phyag dang bcas zhabs gnyis spyi bor blangs te gsol ba rtse gcig tu 'debs pa'i sgo nas smon lam sna tshogs pa mang po mdzad | 'ba' mda' nyid kyi zhal nas | gzhan dag la | da lan