[A:468] dag gi sgor 'jug pa'i gzhi gcig pu ni blang dol ji bzhin shes pa la rag las shing de yang thos lo dang shes lo tsam gyis gar yang mi phyin pas dge ba'i bshes gnyen lung dang rigs pa'i dbang phyug rmongs mun sel ba'i chos kyi nyi ma zhig yun ring du gus pas bsten par bya'o snyam pa'i thugs dam nam yang mi lhod pa'i rkyen bskul la nye bar brten nas 'dzi yul smad kyi sribs phyogs dge 'phel ri khrod du rje btsun tAranAtha gang dang thugs rgyud gcig pa byang bla brang dgon chags 'debs mdzad mkhan kun mkhyen bla ma 'jam dbyangs bzhad pa'i rdo rje'i rnam 'phrul du grags shing grub pa'i lung rigs smra ba'i dbang phyug chen po thub btsan dge legs rgya mtsho sku dngos bzhugs pa'i drung du phyin te gang gi zhal snga nas | gzhung lugs kyi chos bka' rgyal ba'i bstan pa la 'jug pa'i sgo gcig pur gyur pa nyid kyis mdzad pa'i tshad dgongs gtsor byas pa'i legs bshad ltar gyi phar phyin TIka | dbu ma 'jug pa'i rgyas 'grel pod gnyis sogs mdo dang sngags kyi gzhung lugs rgya che ba'i gnad la nyer mkho'i gzhung tshan du ma zhig gus sbyor dang rtag sbyor gyi nas snga rjes kun tu lo brgyad dgu tsam la dam pa mchog gi drung du rgyun bzhugs lhur mdzad de slob gnyer la sgo kun nas dka' ba khyad du bsad ngal ba dang du blang bas nyin mtshan la 'os med kyi gnyid dang g.yeng ba spangs te brtson pa ched gnyer chu bo'i rgyun bzhin chad med du thos bsam gyis gzhung don dka' ba'i gnas mtha' dag la sgro 'dogs chod nges byas te yun ring du bslab sbyang mdzad skabs rje dpal ldan bla ma gang gi spyir thugs slob rnams las dbang po rab 'bring tha ma'i tshul du rang rang dang 'tshams par rab rnams la bka' bkyon sdang drag gi rnam pa dang | 'bring dag la de mthun gyi bskul slong dang | tha ma rnams la thugs zhi ba'i tshul gyis rang dgar rang mos su 'jog pa'i mdzad tshul yin na de dus su thugs slob dam pa 'di nyid la'ang ches dbang po rab kyi gdul bya 'dul thabs kyis bar bar du mtshang nas rgol zhing rtag tu bka' bkyon pa sogs kyi sgo nas nyin cig khong nyid bzhugs pa'i gzims khang gi nye 'dabs kyi thal phung che ba yod pa de slob bu dam pa 'di nyid gcig pus nab 'gags kyi thu bar blugs te gnas gzhan du spar ba zhag 'ga'i ring byed dgos byung yang sngon rje mar pa la mi las zhabs phyi bgyis te bka' legs sgrub kyi rnam par thar pa ltar dam pa 'dis kyang bla ma'i bka' bzhin bsgrubs te dad gus shugs drag dang bcas thugs dga' spro gting nas che ba'i ngang mngon lkog gnyis med kyis sgo kun nas bla ma'i zhabs g.yog thugs dgyes nges bsod nams bsags sgo rgya cher mdzad pa las yid la dogs pa tsam yang lta ci dag snang dang dad gus bzod blag med pa shugs je 'phel du 'gro ba'i rkyen du gyur pa sogs tshul de ka'i sgo nas mdo sngags kyi gzhung lugs la rang byan ma tshud kyi bar du dam pa mchog de'i sku drung du legs bzhugs mdzad |