[A:555] lam gyi thabs mchog gis | | sprin dang rdul sogs sangs pa'i nam mkha' bzhin | | dri ma kun spangs dri med de bzhin nyid | | mngon du gyur tsam 'bras bur ston la 'dud | | ces sogs kyis mtshon rdzogs ldan chos mchog gi dgongs don dpyis phyin rtsal thon nye bar mdzad pa'i phyir ro | |
de lta bu'i nges don gyi dpal ldan bla ma gang dag gi chos sku rang byung gi ye shes mchog 'bad med lhun grub kyi 'gro don chad med du nges par byung ba de dang gang 'dul gyi gdul bya'i smon lam yang dag pa lhan cig tshogs pa las gzhan snang ngor gzugs sku'i rnam par 'phrul ba rang rang dang 'tsham par dus su bslu med du legs byung mdzad pa ste | 'phags pa gser 'od dam pa'i sde snod las | bka' stsal ba | nam mkha''i snying po | dper na nyi zla dang chu dang me long la rtog pa med bzhin du gzugs brnyan 'byung ngo | |
de bzhin du de bzhin nyid kyi ye shes la rnam par rtog pa mi mnga' yang | smon lam gyi stobs kyis sems can skal ba dang ldan pa rnams la gzugs kyi sku gnyis kyis 'gro ba'i don mdzad de | ces gsungs pa'i phyir | gzhan snang ngor 'gro don mdzad yang rnam pa sna tshogs pa'i sgo nas gang 'dul gyi mdzad chen sna tshogs pa gdul bya sems can gyi khams dbang bzhin gyi rjes su nges par 'gro ba'ang yin te | lag na me tog gi mdor | sems can la lar de bzhin gshegs pa'i gzugs ston no | | sems can la lar lha'i lus mthong bas 'dul lo | | sems can la lar skyes pa'i gzugs kyis 'dul lo | | la lar bud med kyi gzugs su mthong bas 'dul lo | | lalar lus chen pos 'dul lo | | lalar lus chung ngus 'dul lo | | zhes sogs gsungs pa ltar yin pa'i phyir | mdzad tshul sna tshogs pa de dag kun kyang des yid bzhin gyi nor bu las dgos 'dod 'byung ba dang gzhi dwangs par snang brnyan sogs ji bzhin du 'bad med lhun gyis grub par byung ba yin par rgyal ba nyid kyi dgongs pa ji bzhin rgyal tshab mchog gang nyid dang 'phags pa klu sgrub rjes 'brang bcas kyis ji skad dgongs 'grel kyang legs par mdzad pa ste | rgyud bla ma las | ji ltar baidur sa gzhi gtsang ma la | lha dbang lus kyi gzugs brnyAn 'char ba ltar | | de bzhin gdul bya 'gro sems dag pa la | thub pa'i dbang po'i sku ni gzugs brnyan 'char | | zhes dang | chos dbyings bstod pa las | dri ma med pa'i chos sku la | | ye shes rgya mtshor gnas gyur na | | snan tshogs nor bu ji bzhin du | | de las sems can don mdzad 'byung | | zhes dang | spyod 'jug las kyang | yid bzhin nor bu dpag bsam shing | | ji ltar re ba yongs bskang na | | de bzhin gdul bya smon lam gyi | | dbang gis rgyal ba'i skur snang ngo | | zhes gsungs pa la sogs pa'i phyir ro | |
rgyu mtshan de dag gi phyir na gnas lugs rang byung don gyi ye shes nas gzhi dang 'bras bu dbyer