[A:570] yang yang ma brjed par dran pa dang bzhi po mos gus tshad phyin du che bsngags gong ma dag gis mdzad pa'o | |
de nas bla ma dam pa slob dpon de nyid slob ma gang dag gis sbyor bas bsten tshul yang | bla ma lnga bcu pa las | 'dir mang smos pa ci zhig dgos | | bla ma dgyes byed gang yin bya | | mi mnyes byed kun spang ba ni | | de dang de la 'bad de brtag | | dngos grub slob dpon rjes 'brang zhes | | rdo rje 'dzin pa nyid gsungs par | | shes nas dngos po thams cad kyis | | bla ma yongs su mnyes par bya | | zhes gsungs pa ltar mnyes pa bsgrubs pa dang mi mnyes pa spong ba la gnad thams cad 'dus shing de yang mnyes pa bsgrub pa la lus kyi sgo nas zang zing gi 'byor pa gces dgu legs 'bul dgos tshul sngon mnyam med jo bo rje yer pa lha ri snying po'i mgul na bzhugs dus | dge bshes 'brom gyis gser zho dgu dgu la srang re byas pa'i srang brgya dang bcu | rta bco brgyad la sogs pa'i 'bul mo che phul | rNgog legs pa'i shes rab kyis bka' gdams pha chos zhu dus gser gyi maNDala mda' gang ba la rin po che sna tshogs pa'i tshom bu bkod nas phul ba dang | lho brag mar pa la gzhung gi rNgog ston chos rdor gyis bsnyan brgyud kyi gdams pa zhu dus phyi nang gi nor tshad dang | tha na ra ma rgan mo rkang pa chag pa yan chad phul ba ltar | zang zing gi or gang yod phul nas bla ma mnyes par bya dgos shing | gzhan yang bla ma mchog la slob mas lus kyi sgos phyag 'bul skor ba byed pa dang | nye ba dang ring ba'i phyag g.yog dang las kyi mtha' dang | pho nya dang rkang 'gro sogs dgos pa'i bya ba thams cad byed de | tha na chu thal phyag tshun chad kyang legs par bya dgos | ngag gi sgo nas kyang | dngos lkog gang du yang skur 'debs dang gshe ba sogs tshig gcig kyang mi byed | tshig 'jam pa dang drang po bden pa phyi nang med par smra | bla ma'i thugs su 'thad pa dang | rang yang yid phebs pa dang | tshig gsal bas gab gsang med par nang yan byas kyin zhu | sgo thams cad nas snyan pa dang | bstod pa dang | che ba brjod pa dang | yid kyis gong smos bzhin bla ma sangs rgyas dngos su mthong zhing ci mdzad thams cad legs pa kho nar blta ba sogs sgo gsum gyis bsnyen bkur rim gro gang gzab kyis bla ma'i thugs mgu nges bya ba gal che tshul mdo sde'i rgyan las | bkur sti rnyed pa dag dang rim gro dang | | sgrub pa'i sgo nas bshes gnyen bsten par bya | | zhes dang | brtan pa ji skad bstan pa bsgrub pa des | | de yi sems ni yang dag mgu bar byed | | ces gsungs la | bla ma la slob mas yon 'bul dgos tshul | bla ma lnga bcu pa las | rang gis dam tshig slob dpon ni | sbyin min bu dang chung ma dang | | rang srog gis rtag bsten bya na | | longs spyod g.yo bas smos ci dgos | | zhes gsungs pa ltar dang | de ltar byas pa'i phan yon yang | de nyid las | de byin sangs rgyas