[A:573] rdor gyi rgyud las ji bzhin gsungs pa'ang 'di ltar ste | ji skad du | gzhan gyis brjod min lhan cig skyes | | gang du yang ni mi rnyed de | | bla mas dus thabs bstan pa dang | | bdag gi bsod nams las shes bya | | zhes gsungs shing | ye shes chen po de nyid bla mas brda sprad pa'i skad cig de nyid du slob ma la rig pa ye shes kyi rang ngo nye bar 'phrod pa'i bka' drin gyi cha nas mkha' 'gro kun spyod kyi rgyud las | gang gi drin gyis bde chen nyid | | skad cig nyid la 'char ba gang | | bla ma rin chen lta bu'i sku | | zhes pa'ang gsungs pa yin la |
de 'dra'i bla ma'i man ngag la brten nas sngon 'das pa dang da ltar gyi dus dang ma 'ongs 'byung bar 'gyur ba gang gi rnams su byon zin byon bzhin 'byon 'gyur gyi sangs rgyas yod do cog kyang nges par byon dgos pa sha stag las med pa'i tshul la dgos nas yon tan yongs bzung gi rgyud las | bla ma med pa'i gong rol la | | sangs rgyas bya ba ming yang med | | 'das dang ma 'ongs sangs rgyas rnams | | bla ma dag la brten nas 'byung | | zhes gsungs shing | bla ma'i zhal gyi man ngag gi chos la ma brten dang | | de yi man ngag ma thob par | | 'khor ba rgya che rgya mtsho las | | pha rol phyin par mi 'gyur ro | | zhes gsungs pa dang |
dbang lung man ngag ston pa'i slob dpon nyid zab mo chos kyi mig snying lus khog dang 'dra zhing 'di lhag par gnyan pas bla ma'i dam tshig kho na bsrung nus na gzhan po byang sngags kyi bcas mtshams la nyams pa song yang mthar thug mchog gi go 'phang la bar chad mi yong tshul bram ze bsod snyoms pa'i rgyud las | dbang bskur bla ma mig dang 'dra | | man ngag ston pa nying dang 'dra | | rgyud ston pa ni lus dang 'dra | | de la dam tshig ma nyams na | | 'dul khrims nyis brgya lnga bcu dang | | byang sems sdom pa nyi shu sogs | | nyams kyang rdo rje 'dzin pa thob | | ces gsungs pa lta bu yin zhing | dgongs pa de mthun du grub pa'i dbang phyug sa ra has | bla mas gdams ngag phog pa'i slob ma gang dag la ye shes chen po'i gter ji bzhin mngon du gyur tshul gsungs pa | bla mas smras pa gang gi snying zhugs pa | | lag pa'i mthil na gnas pa'i gter mthong 'dra | | zhes pa ltar dang | dpal ldan rtsa ba'i bla ma mchog gi bka' drin las slob tshogs la grol ba nges par thob pa dang sdig pa dang de'i 'bras bu sdug bsngal bcas las sgrol bzhin bde ba'i go skabs legs sbyin gyi tshul slob dpon klu sgrub kyis mdzad pa'i rim lnga las kyang | ri dbang rtse las 'ga' zhig lhung gyur na | | lhung bar mi 'dod kyang ni lhung bar 'gyur | | bla ma'i drin las phan pa'i lung thob na | | grol bar mi 'dod kyang ni grol bar 'gyur | | zhes pa dang | slob dpon gyis ni sdig pa 'phrog | | slob dpon gyis ni 'jigs pa