[A:578] 'di ltar theg pa gsum po'i gang zag dang chos ston pa'i dge slong la gus pa dang bla ma'am ston pa'i 'du shes mi bskyed na de dag mthong ba'i chos 'thob pa'am thob pa chud mi za ba ni gnas med de ma gus pas ni chos nub par 'gyur ba'i phyir ro | | zhes gsungs pa ltar ji bzhin shes par bya'o | |
de ltar bla ma bsten pa'i tshul la ji bzhin bsten pa'i phan yon dang log par bsten pa'i nyes dmigs legs par zhib tu shes pa'i sgo nas mdor na bla ma'i skyon la mi brtag pa dang | ci mdzad yon tan du shes pa dang | re dogs 'gog pa'i thag chod dang | gnyen gshin pa'i bsam pa dang bzhi po tshang na mos gus lam du 'gro bar sngon byon gong ma dag gis gsungs shing | mos gus byas pa'i dgos don gong ma dag gis gsungs pa | bla ma sangs rgyas su mthong na sangs rgyas kyi byin rlabs 'jug byang chub sems dpar mthong na byang chub sems dpa'i byin rlabs dang | grub thob tu mthong na grub thob kyi byin rlabs | so so'i skye bo'i dge bshes bzang por mthong na de dang mthun par byin rlabs 'jug ste | lar mos gus med na byin rlabs mi 'jug go | | ces pa'i don ji lta ba bzhin te | byin rlabs dngos grub mtha' dag bla ma la mos gus yod med la rag las shing mos gus ni bla ma'i rnam thar ji bzhin shes pas legs par byung dgos pa de bas na bla ma'i rnam thar shes pas mos gus byung de las mchog thun mong gi dngos grub 'byung ba nam yang mi bslu ba'i rten 'brel gyi 'byung sgo 'gog mi nus pa nges par yin tshul dri med 'od zer rgyas pa'i rgyud las | rdo rje slob dpon thams cad mkhyen | | kun mkhyen ye shes dbang gi rgyal | | mos gus drag po 'byung ba'i gzhi | | bla ma'i rnam thar rgyas bsdus rnams | | yid bzhin nor bu lta bu can | | yang yang blta bar brtson gyur na | | dngos grub thob par the tshom med | | ces gsungs pa ltar mos gus 'byung ba'i gzhi bla ma'i rnam thar rgyas bsdus gang rung la blta zhing de'i don la goms 'dris kyis yang yang sems pa gang dag la rang rang dang 'tsham pa'i dngos grub dus su bslu ba med cing som nyi mi dgos pa rdo rje 'chang chen po'i bka' las nges par byung bas bdag gis kyang de lugs la bsam nas gong dkyus su dam pa gang dag gi rnam par thar pa cung tsam re brjod 'os su babs pa la brtson pas 'bad khul brgyis so | |
(4) 'phags pa mchog gi mdzad tshul |
bzhi pa 'phags pa mchog gi mdzad tshul ni | spyir 'phags pa'i sa la gnas pa'i slob pa dang mi slob pa'i 'gro ba skyobs byed kyi thabs la mkhas pa'i mdzad bzang gi tshul de yang 'gro 'dul dus su babs pa'i phan pa rlabs po che'i mnga' bdag dag gis rang rang gi gdul zhing sna tshogs pa'i dbang gis dper na rgyal po'i rigs kyi gdul bya la rgyal po'i rnam pa dang dge sbyong gi rigs la dge sbyong gi