[A:51] dang | yar 'brog khri dpon bstan 'dzin | sde pa kun spangs drung | rgyal rtse'i yum mnga' bdag rgyal mo sogs bod kyi che rgu mtha' dag gis dbu blar bsten | dbang bka' man ngag skor thugs la bzhugs rim | sgrol ma mgon po'i skor | snyan brgyud tshad ma bzhi ldan gyi chos skor | sgom rum pa nas brgyud pa'i grol mchog khrid brgya'i skor | blo sbyong skor | snying po don gsum | sems nyid ngal gso | thig le bcu drug | sher phyin bka' bab drug pa | zhi byed lam lnga | byams chos sde lnga | kyai rdor 'khor chen bskyed rdzogs | dus 'khor man ngag | sbyor drug | lam 'bras | gsang 'dus rim lnga | bde mchog | rdo rje gdan bzhi | nAro chos drug | naigu phyag chen ga'u ma sogs dbang lung man ngag brgya rtsa brgyad kyis mtshon jo nang shangs pa | sa skya sogs kyi dbang bka' mang po dang | tshe dbang 'chi med dpal ster sogs rnying phyogs kyi chos skor dang bcas zab chos kyi mdzod chen por bzhugs la | rgyal ba dge 'dun rgya mtsho dang lan gnyis mjal bas dang po'i skabs 'bel gtam dang phan tshun thugs mnyes mdzad | rjes mjal dus chos 'brel bka' gdams nor phreng gi rtsa ba'i lung zhus | mdor na rje 'dis mdo sngags lam gyis mchog brnyes shing rnam dkar mdzad pas 'gro don lhag par che ba mdzad lags so | | khyad par gser mdog can | dpal 'khor bde chen | rtse chen | ngam ring sogs dgon sde mang po'i chos khrir 'khod kyang bya btang yang pa blo bde byas nas dgon sde'i zhal 'dzin cher ma mdzad de rnal 'byor rang sa 'dzin dus sems kyi mdud grol zhes pa'i mtshan thogs | bar skabs re jo nang gi gdan sa mdzad | sku tshe'i smad du chos lung byang rtse btab nas sgrub sde la gtso bor mdzad | bu slob kyi gtso bo | rdo ring kun dga' rgyal mtshan | chos sku lha dbang grags pa | mkhas dbang byams pa lhun grub | mkhan lung rig rgya mtsho | rje drung kun dga' dpal bzang rnams so | | de nas sngon gyi skye rabs dang rjes nas yang srid ngos 'dzin sogs kyi lung bstan gsal bar mdzad de bstan 'gro'i don re zhig rdzogs tshul gyis dgung lo drug cu me stag lo'i zla ba dang po'i tshes brgyad la gzugs sku chos dbyings su thim pa'o | |
bcu gsum pa dga' byed sa skyong ni | rgya gar du gAya zhes pa'i grong khyer na | rgyal po bharatari'am ( rAmabartari ) bya ba | yul magadha | bcom brlag | bra ya ga rnams kyi bdag por gyur pa zhig gi sras su 'khrungs | rgyal po de mu stegs pa la dad pa zhig ste | rgyal bu bltams pa'i btsas ston du pho brang gi yang thog tu bram ze rnams mchod pa'i las byed du bcug skabs rnal 'byor pa zhig gang byung cha med du thon | de la bram ze dag gis songs shig byas pas | rnal 'byor pa dang kho rang rnams kyi mchod rdzas bcas mi snang bar gyur pas ya mtshan skyes | yang rnal 'byor pa gzhan zhig byung nas dam pa guru nAma zhes smras nas de yang mi snang ngo | de nas re zhig na btsas ston cher byed skabs