[A:54] sems sogs rang shugs kyis mnga' | yi ge 'bri klog phal cher dang | khyad par yi dam chos skyong gi mngon rtogs rtsa sngags gtor chog rnams sus kyang ma bslabs par rang shes su mkhyen pa yin la | dgung lo gsum dang zla ba phyed drug lon skabs chos rje bstan 'dzin pa sprul sku ngos 'dzin mjal kha zhu ched la byon kyang sku skyes mchog nas byang stag rtse'i TA ma ru gsal por ngos bzung ba tsam ma gtogs bka' lung cher ma gnang ba sogs kyis re zhig 'gyangs | de nas mkhan chen lung rig rgya mtsho pho brang dkar po na bzhugs skabs stag lo'i hor zla brgyad pa'i tshes bcu lnga'i nub mkha' 'gros lung bstan dang rjes nas sde pa sna dkar rtse bas bskul zhing lo rgyus rnams dang mkhan rang la sngar rje gong mas gnang ba'i lung bstan shogs khra sogs dang ches mthun pas thugs yid ches te rten 'brel legs pa'i 'byor pa dang bstun nas 'di skabs dgung lo bzhi steng sprul sku spyan 'dren byed mkhan lung rig rgya mtshos rgyal rtse nas byang zhabs drung bkra shis stobs rgyas dbang po'i bar gyi mi sna drag bsdus rta pa brgya dang drug cu rtsa lnga 'khor g.yog bcas mang po bsdus te | mkhan rang nyid sprul pa'i sku bslu zhing mnga' gsol ba'i ched byon te khong gnyis mjal 'phrad skabs sngon gyi 'du shes gsal pos phan tshun thugs dgyes tshor chen po mdzad | mkhan rang dang sde pa sna dkar rtse bas sprul sku dang yab yum bcas la 'bul ba legs pa bgyis te zla ba ( dgu ba'i nyer lnga ) bcu pa'i tshes bzhi la mchog gi sprul sku'i chibs kha bsgyur | de nas rim gyis gtsang phyogs su byon te | sde bdag zhal ngo dgon pa sogs rim bzhin ngos 'dzin dang zhal 'phros gong ma'i dus ji bzhin mdzad | chos lung byang rtser khri ston mdzad skabs rje gong ma'i bu slob rdo ring kun dga' rgyal mtshan | thugs sras lha dbang grags pa | mkhan chen lung rig rgya mtsho | mkhas dbang byams pa lhun grub | rje drung kun dga' dpal bzang sogs bu slob yongs rdzogs zhal 'dzoms shing dga' ston phun sum tshogs par mdzad | de nas dgung lo brgyad par dpon slob rnams kyi gros steng nas dpal stag lung pa chen po kun dga' rgyal mtshan gdan drangs nas rab tu byung ste | mtshan kun dga' snying po bkra shis rgyal mtshan du gsol shing | dag snang du sprul pa'i bshes gnyen rgya gar ba jwalanAthas | tAranAtha zhes pa'i ming bstsal | mkhas mchog byams pa lhun grub gnas kyi bla mar bsten nas mdo rgyud la gsan sbyang mdzad de mkhas pa'i gnas thob | rdo rje ring ba las lam 'bras gtso bor gyur pa'i dbang gdams pa bsam gyis mi khyab pa gsan | rje brag stod pa chos sku lha dbang grags pa'i drung nas chos drug phyag chen rnams kyis gtsos man ngag mtha' yas pa legs par gsan pas nang zab lam gyi mngon par rtogs pa'i klong rdol te rdo rje'i gnas pa bcu gnyis kyi ye shes mchog rim gyis brnyes te grub pa'i dbang phug gi go 'phang thob bo | rje drung kun dga' dpal bzang nas dus 'khor dang mgon bka' rnams gnang zhing jo nang gi gdan sa gtad |