[A:62] pa| | mdo mkhams tshab ba rong du 'byung bar 'gyur | | yang dag lta ba'i seng ge'i sgra sgrogs pas | | ltar ngan rigs can ma lus tshar bcad nas | | mdo khams gnas su nga yi bstan pa 'byung | | de yi sras la yongs 'dzin dpag tu med | | rgyal ba'i chos lugs yun ring gnas par 'gyur | | zhes pa'i lung bstan pa'i drung ratnashrI 'dzam gling stong khun rgyal po'i yul mtha' shar rgyal mo tsha ba rong du 'khrungs | jo nang dpal du byon nas phyogs rgyal ba yab sras kyi drung nas mdo sngags kyi zab chos gsan te rdzogs par thugs su chud nas 'phrin las rnam bzhi la mnga' brnyes pa zhig go | yang kun mkhyen chen pos 'di skad gsungs pa ste | nga ni 'di nas 'gro ba'i zhag 'ga' na | | 'phrin las rnam bzhi'i glog dkar drwa ba can | | 'jam dbyangs dpa' bo jNnAnaheruka | | lta ngan mun sel mi bzad drag po che | | dge slong dpa' bo chen po thung can pa | | kha spu ldan pa'i ratnashrI zhes pa | | ri khrod chen po 'di na 'ong bar 'gyur | | bu khyod kyi ni rjes su 'jug gyur te | | ro mchog dam chos bdud rtsis rgyud tshim nas | | ma ki 'dzi ka zhes pa'i sa phyogs su | | chu bo'i 'gram la brten pa'i lung ba ru | | skye bo dmu rgod dar ba'i yul sa na | | ami sku mched dag gi bstan pa rgyas | | gnod sbyin gter bdag ming gi dgon pa ru | | dus kyi 'khor lo'i bshad sgrub gtso bor ston | | zab lam rdo rje theg pa'i dge legs rgyas | | kun gyis mchod gnas bkur bsti bya ba'i gnas | | zhes pa'i lung bstan pa'i dgon gnas 'tshol bzhin drung ratnashrI jo nang nas phyir khams phyogs su phebs pas 'dzi chu rgyas nas rab ma tshugs par der bzhugs | | lung bstan pa'i dgon gnas 'di yin kyang da lan dgon pa zhig 'dug pas ji ltar bya dgongs nas thog mar thabs kyis gnas tshang g･yar dgos zhes mjal dar bskur ba la | dgon de bon po'i dgon pa yin pas dgon gyi bon po rnams kyis tshur dar dang bzhugs gdan phul ba sogs rten 'brel legs par 'grig | de nas phyis su drung ratnashrIs cho 'phrul gyi mdzad pa mang po dag bstan pas bon po rnams kyis dgon gzhi phul te kho rang rnams yul bud nas song shul gyi gnas su drung dka' bzhi rin chen dpal nyid kyis shing mo sbrul lo la dpal gyi 'dzam thang chos sde chen po btab ste nges don gyi bstan pa'i gzhi btsugs te bshad sgrub kyi bstan pa nges gsang zab mo'i lugs bzang sgrub brgyud gtso bor byas nas dar rgyas su mdzad pa'i dbu brnyes pa ste | 'di skabs su jo nang dpal du rgyal tshab 'dzin pa 'jam dbyangs dkon mchog bzang po'i dus tsam yin par mngon | de nas mdo smad 'dzam thang gi chos sde der drung dka' bzhi pas zhi rgyas dbang drag gi gang 'dul gyi mdzad pa mtha' yas pa'i sgo nas mtha' 'khob dmu rgod kyi sems can 'dul dka' ba rnams btul te nges don gsang chen theg pa'i chos sgor btsun nas bstan 'gro'i don rgya cher mdzad de bstan pa rgyas shing 'gro ba'i bde skyid 'phel bar byas la | de nyid kyi gdan sa 'dzin pa mkhan chen