[A:320]མཁས་པ་འཇུག་པའི་སྒོ་དང། ཐུབ་པའི་དགོངས་པ་གསལ་བ་ལ་སོགས་པ་མདོར་ན་གཞུང་ལུགས་དྲུག་ཅུ་ཐམ་པ་ལ་འཆད་ཉན་གྱི་སྒོ་ནས་ཡུན་རིང་དུ་གཏན་ལ་ཕབ།
གཞན་ཡང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང། བསྙེན་པར་རྫོགས་པར་མཛད་པ་སྟོང་ཕྲག་ཙམ་དང། འཕགས་པ་ཀླུ་སྒྲུབ་དང། ཐོགས་མེད་དང། ཞི་བ་ལྷའི་ལུགས་གསུམ་པོ་གང་ཡང་རུང་བའི་སྒོ་ནས་གཞན་བྱང་ཆུབ་སེམས་དཔའི་སྡོམ་པ་དང་ལྡན་པར་མཛད་པ་ནི་གྲངས་ལས་འདས་སོ༎
མདོར་ན་དམ་པའི་ཆོས་བཤད་པའི་སྒོ་ནས་སློབ་མ་ལ་གོ་བ་བསྐྱེད་པ་ལ། བདག་ཉིད་ཆེན་པོ་འདི་ལས་མཁས་པ་གཞན་སུ་ཡང་ཡོད་པ་མ་ཡིན་ཏེ། འཆད་པ་པོ་གཞན་རྣམས་ནི་ཚིག་གི་ཕྲེང་བ་སྟར་ལ་བརྒྱུས་པའི་སྒྲིབ་གཡོགས་ཀྱིས་བསྒྲིབས་ནས་འཆད་ལ། རྗེ་བཙུན་མཁས་པའི་དབང་པོ་འདིས་ནི། གཞུང་ལུགས་གང་འཆད་ཀྱང་ཐོག་མར་བསྡུས་དོན་གྱི་སྒོ་ནས་དོན་གྱི་མཚམས་བཅད་ཅིང། སྐབས་ཀྱི་དོན་ནི་འདི་ཡིན་ནོ་ཞེས་ཡིད་ལ་འབབ་ཅིང་རྣ་བར་སྙན་ལ། ཚིག་ཉུང་ཞིང། དོན་མང་ལ་བཟུང་སླ་བ་ཞིག་ཐོག་མར་བསྟན་ནས། དེའི་རྗེས་སུ་ཚིག་གི་འབྲུ་རེ་རེ་ནས་གཉེར་ཞིང་རྣམ་དབྱེ་མ་འདྲེས་པར་འཆད་པས་སོ༎
དེའི་རྒྱུ་མཚན་གྱིས་སློབ་མ་རྣམས་བློ་སྐྱེད་གཞན་ལས་ཆེ་ཞིང། དེའི་སྙན་གྲགས་ལ་བརྟེན་ནས་བློ་གསལ་བའི་དོན་གཉེར་རྣམས་མ་བསྡུས་པ་ཡང་རང་གི་ངང་གིས་འཁོར་དུ་འདུ་ཞིང། ཉིན་ཐོག་ཐག་ཆོས་གྲྭར་བསྡད་ཀྱང་དུབ་པ་དང་སུན་པ་མེད་ཅིང་གཉིད་དང་རྨུགས་པའི་གཞན་དབང་དུ་མི་འགྲོ་བར་ཉམས་དགའ་ཡལ་ལེ་བའི་ངང་ལ་དུས་འདའ་ཞིང། ཆོས་གྲོལ་བའི་ཚེ་གྲོལ་དུ་ཕངས་པ་དང། ཆོས་གྲྭར་དང་པོར་འགྲོ་བའི་ཚེ་དགའ་བ་དང་སྤྲོ་བ་རྒྱ་ཆེན་པོ་སློབ་དཔོན་གཞན་གྱི་ཆོས་ཉན་བཤད་ཀྱི་དུས་འབྱུང་བའི་གོ་སྐབས་མེད་པ་དག་འབྱུང་བར་མངོན་