[A:320]mkhas pa 'jug pa'i sgo dang/ thub pa'i dgongs pa gsal ba la sogs pa mdor na gzhung lugs drug cu tham pa la 'chad nyan gyi sgo nas yun ring du gtan la phab/
gzhan yang legs par gsungs pa'i chos 'dul ba la rab tu byung ba dang/ bsnyen par rdzogs par mdzad pa stong phrag tsam dang/ 'phags pa klu sgrub dang/ thogs med dang/ zhi ba lha'i lugs gsum po gang yang rung ba'i sgo nas gzhan byang chub sems dpa'i sdom pa dang ldan par mdzad pa ni grangs las 'das so//
mdor na dam pa'i chos bshad pa'i sgo nas slob ma la go ba bskyed pa la/ bdag nyid chen po 'di las mkhas pa gzhan su yang yod pa ma yin te/ 'chad pa po gzhan rnams ni tshig gi phreng ba star la brgyus pa'i sgrib g.yogs kyis bsgribs nas 'chad la/ rje btsun mkhas pa'i dbang po 'dis ni/ gzhung lugs gang 'chad kyang thog mar bsdus don gyi sgo nas don gyi mtshams bcad cing/ skabs kyi don ni 'di yin no zhes yid la 'bab cing rna bar snyan la/ tshig nyung zhing/ don mang la bzung sla ba zhig thog mar bstan nas/ de'i rjes su tshig gi 'bru re re nas gnyer zhing rnam dbye ma 'dres par 'chad pas so//
de'i rgyu mtshan gyis slob ma rnams blo skyed gzhan las che zhing/ de'i snyan grags la brten nas blo gsal ba'i don gnyer rnams ma bsdus pa yang rang gi ngang gis 'khor du 'du zhing/ nyin thog thag chos grwar bsdad kyang dub pa dang sun pa med cing gnyid dang rmugs pa'i gzhan dbang du mi 'gro bar nyams dga' yal le ba'i ngang la dus 'da' zhing/ chos grol ba'i tshe grol du phangs pa dang/ chos grwar dang por 'gro ba'i tshe dga' ba dang spro ba rgya chen po slob dpon gzhan gyi chos nyan bshad kyi dus 'byung ba'i go skabs med pa dag 'byung bar mngon