[A:321]སུམ་གྱིས་གྲུབ་ཅིང། དེ་ཡང་ཐུགས་རྒྱུད་བྱང་ཆུབ་ཀྱི་སེམས་གཉིས་ཀྱིས་ལྷག་པར་ཕྱུག་པའི་རྒྱུ་མཚན་གྱིས་ཡིན་པར་ངེས་སོ༎
མདོར་ན་གངས་ཅན་གྱི་མཁས་པ་རྣམས་ཀྱི་ནང་ནས། གསུང་དངོས་སུ་ཐོས་པའི་སློབ་མ་གཞུང་ལུགས་ཤེས་པའི་གྲངས་ནི་བདག་ཉིད་ཆེན་པོ་འདི་ལས་མང་བ་མེད་དོ༎
དེ་དག་ལ་འདི་སྐད་ཅེས།
མཁའ་ལྡིང་གིས་ནི་ཆུ་གཏེར་གྱི༎
བདུད་རྩི་སྙིང་པ་རབ་ཕྱུང་ནས༎
སུམ་རྩེན་དཔག་བསམ་རྩེར་འཁོད་དེ༎
ལྷ་རྣམས་ཀུན་དགར་བྱས་ཞེས་ཐོས༎
རྣམ་དཔོཡད་བཤོག་རླབས་ཅན་ཞལ་གྱིས༎
གསུང་རབ་རྒྱ་མཚོའི་བཅུད་ཕྱུང་ནས༎
མཁས་པས་བཏེག་པའི་ཁྲིར་འདུག་སྟེ༎
ས་སྟེངས་བློ་གསལ་ཀུན་དགའི་དཔལ༎
གཞན་དག་གཞུང་ལུགས་གང་འཆད་ཀྱང༎
ཚིག་གི་ཕྲེང་བ་སྟར་ལ་བརྒྱུད༎
ཁྱོད་ཀྱིས་དོན་གྱི་མདོ་བཟུང་བས༎
བསྟན་བཅོས་ཚིག་རྣམས་ངང་གིས་འཆར༎
1.2.5.1.2.1.2
གནས་གང་དུ་ཡོན་གྱི་བདག་པོ་སུས་མཛད་པ།
གཉིས་པ་ནི།
དགེ་ལེགས་ཚོགས་ཀྱིས་རབ་གང་བའི༎
ནོར་འཛིན་ཁོར་ཡུག་དང་བཅས་པ༎
ཆུ་གཏེར་དབུས་སུ་བྱིང་བ་ན༎
ཁྱབ་འཇུག་གིས་ནི་བཏེག་ཅེས་གྲགས༎
བསྟན་པ་འདེགས་པའི་ཀ་ཆེན་ཡང༎
གཏོང་ཕོད་ལུགས་བརྒྱ་ལྡན་པ་ཡི༎
ས་སྐྱོང་འབྱོར་པའི་སྟེགས་ཀྱིས་ནི༎
གུས་པས་བཏེག་པ་དེར་ཕྱག་བྱ༎
དེ་ཡང་རྗེ་བཙུན་རྣལ་འབྱོར་གྱི་དབང་ཕྱུག་ཆེན་པོ་འདི། གཡོན་རུ་ཁྲ་འབྲུག་གི་གཙུག་ལག་ཁང་དང། ཐང་པོ་ཆེ་དང། དཔལ་རྩེ་ཐང་དང། ཕག་མོ་གྲུའི་གདན་ས་ཆེན་པོ་རྣམས་སུ་ཆོས་ཀྱི་འཁོར་ལོ་བསྐོར་བའི་བདག་པོའི་རྐྱེན་ནི། དབང་གྲགས་པ་རྒྱལ་མཚན་དཔལ་བཟང་པོས་གནང་བ་དང། ཆེ་ས་དགོན་བསར་བ་དང། རྒྱལ་བཟང་རིན་རྒྱལ་ལ་སོགས་པ་རྣམས་ཀྱིས་ཕུལ་ལོ༎
བསམ་ཡས་ཀྱི་གཙུག་ལག་ཁང་དུ། ཆོས་ཀྱི་འཁོར་ལོ་སྐོར་བའི་བདག་རྐྱེན་ནི། གཙོ་བོར་ལྷ་དབུ་ཚལ་བ་དང། གསེར་ཁང་དཔོན་འཛོམ་ལ་སོགས་པས་མཛད་དོ༎