[A:330]ཕྱོགས་མ་དེ་མཛེས་པར་མཐོང་ནས། དེ་ལ་འབྱོན་པར་བརྩམས་པས་གཅིག་ན་རེ། ཁྲི་དེ་ལ་མཁན་ཆེན་སངས་རྒྱས་དཔལ་སློབ་དཔོན་གསུམ་འོངས། ཁྱེད་རང་དཔོན་སློབ་གསུམ་གཡོན་མ་དེ་ལ་བཞུགས། ཞེས་ཟེར་རོ༎ མནལ་སད་པ་དང་ཁོ་བོ་གསུང་རབ་ཀྱི་ཚིག་དོན་དང། ལྟ་བའི་གོ་བ་བཟང་བར་རློམ་པ་ཡིན་ཀྱང། ཁོང་པ་དངོས་ལྷག་པར་འདུག་གོ་ཞེས་རྗེས་སུ་ཡི་རང་བར་མཛད་ཅིང། ཚོགས་ཀྱི་དབུས་སུ་དེ་སྐད་ཅེས་ཡང་ཡང་གསུངས་པར་གྲགས་སོ༎
ཡང་བདག་ཉིད་ཆེན་པོ་འདི་ལ་སྔོན་གྱི་དུས་སུ་རྔོག་ལོ་ཆེན་པོའི་ཆོས་ཁྲི་ལ་བཞུགས་ནས་ཆོས་གསུངས་པ་དང། ཡང་དུས་འགའ་ཞིག་གི་ཚེ་ས་སྐྱ་པཎྜི་ཏའི་ཆོས་ཁྲི་ལ་བཞུགས་ནས་ཆོས་གསུངས་པའི་མནལ་ལམ་བྱུང། དེའི་དོན་གྱིས་རང་རེའི་ནཱ་ལེནྟྲའི་ཆོས་ཁྲི་ལ་ས་རྔོག་གཉིས་ཀྱི་སྐུ་འདྲ་བཞེངས་ན་ཆོས་འཕེལ་བའི་རྟེན་འབྲེལ་ཡོད་དོ་ཞེས་གསུངས་པ་ཡང་ཐོས་སོ༎
དེ་དག་ལ་འདི་སྐད་ཅེས།
འཁྲུལ་སྣང་འཁྲུལ་པའི་གཉིད་ལས་རབ་གྲོལ་བའི༎
རྨི་ལམ་རྨི་བའི་མཚན་མ་ལ་བརྟེན་ནས༎
དགེ་མཚན་དགེ་བའི་བློ་ལ་རབ་འཆར་བའི༎
སྨྲ་མཁས་སྨྲ་བའི་དབང་པོ་དེ་འཁྲུངས་སོ༎
Journeys to gTsang province
1st journey
དེ་ནས་ཉི་མ་གཙང་གི་ཕྱོགས་སུ་ལན་གསུམ་ཕེབས་པ་ལས། ལན་དང་པོ་ནི། མཁན་ཆེན་རིན་པོ་ཆེ་ཉིད་འཆད་ཉན་མཛད་པའི་ཕྱི་བཞིན་དུ་འབྲངས། སློབ་མ་བློ་གསལ་བ་རྣམས་ལ་ཟུར་ཆོས་པ་མཛད་ཅིང། དེའི་ཚེ་གདན་ས་ཆེན་པོ་ས་སྐྱ་དང། བོ་དོང་ཨེ་དང། བཟང་ལྡན་དང། ངམ་རིང་དང། སྣར་ཐང་དང། གནས་རྙིང་ལ་སོགས་པའི་གྲྭ་ས་ཆེན་པོ་རྣམས་སུ་གྲྭ་སྐོར་ལ་བྱོན་ཏེ། ལན་འདེབས་པ་པོ་རྣམས་རྩོད་པས་ཟིལ་གྱིས་མནོན་པས་རྩོད་པའི་ཁྱུ་མཆོག་ཏུ་གྲགས་ཤིང། དེའི་ཚེ་རོང་སྟོན་སྨྲ་བའི་སེང་གེ་ཞེས་པའི་མཚན་གསོལ་བ་ཐོབ་ཅིང། མཁན་ཆེན་པའི་སློབ་མ་ཐམས་ཅད་ཀྱིས་ཆོས་གསན་ནོ༎