[A:415]སློབ་མའི་ཚོགས་ལ་ཆོས་ཀྱི་གསུང་ཚུལ་བརྗོད་ནས། ཞར་ལ་རླབས་པོ་ཆེའི་བགྱི་བ་ཇི་ལྟར་མཛད་པ། བརྒྱུད་པ་འཛིན་པའི་བུ་སློབ་ཇི་ལྟར་བྱུང་ཚུལ་བརྗོད་ནས་མཐར་ཕྱིན་པའི་མཛད་པ་ངོ་མཚར་ཅན་ཁ་གཅིག་མདོ་ཙམ་དུ་སྨོས་པའོ༎
3.1
དང་པོ་ནི། སྐྱེས་བུ་དམ་པ་འདིས་ཆོས་གསུངས་པའི་ཐོག་མ་ནི། ཆོས་གྲྭ་གོང་འོག་གཉིས་སུ་བཤད་སྟོན་དང་རྣམ་གཞག་རྒྱ་ཆེན་པོ་མཛད་པའི་སྟེངས་སུ། རྒྱལ་ལྷ་ཁང་གི་དབྱར་དགུན་གྱི་ཆོས་དུས་གཉིས། དཔྱིད་ཀ་བྲ་པོ་སྒང་སོགས་སུ་ཆོས་གཞི་བཏེག་པ་དང་གསུམ་པོ་ལ། མངོན་རྟོགས་རྒྱན་རྩ་འགྲེལ། རྒྱལ་བའི་འགྲོས་ཀྱི་སྟེངས་ནས་ཡོངས་སུ་རྫོགས་པ་ཚར་རེ་སོང་ངོ་ཤེས་པ་ལོ་གྲངས་བདུན་བརྒྱད་དང། གླང་ཐང་དུ་ཆོས་དུས་གཉིས་པ་ལ། ཕར་ཕྱིན་མཁྱེན་གསུམ་ཙམ་རེ་དང། སྐྱེས་རབས། དཔེ་ཆོས། བློ་སྦྱོང་རྣམས་གསུང་པ་ལོ་བཞི་ཙམ་དང། དགོན་ཡན་ཕྱིན་གྱི་སྒྲུབ་མཆོད་ཀྱི་གྲལ་དབུ། ཐེག་ཆེན་ཆོས་ཀྱི་རྒྱལ་པོའི་ཕྱག་ལེན་ཇི་ལྟ་བ་བཞིན་དུ་ལོ་གྲངས་དུ་མར་མཛད། སྐབས་དེར་གླང་ཐང་དུ་སྤྱན་སྔ་རིན་པོ་ཆེ་གོང་མ་བདེ་བར་གཤེགས་པའི་ནང་རྟེན་རྗེ་བཙུན་བྱམས་པའི་གསེར་སྐུ་རྒྱབ་མཐོ་བཅུ་གསུམ་པ། གཙུག་ལག་ཁང་ཀ་ཆེན་བཞི་ཏོག་དང་བཅས་པ་རྒྱས་པར་བསྒྲུབས། རབ་ཏུ་གནས་པ་ཆོས་རྗེ་བཀྲ་ཤིས་རྣམ་རྒྱལ་གྱིས་མཛད། ལྷའི་མེ་ཏོག་གི་ཆར་ཞག་གྲངས་མང་པོར་ཕེབས། མར་གྱི་མེ་ཏོག་བཀྲམ་པའི་ཤིང་སྐམ་པོ་རླན་དང་བྲལ་བ་ལ། ཡལ་ག་རློན་པ་ཁྲུ་གང་ཙམ་གཉིས་འཁྲུངས། གཟིམས་སྤྱིལ་དུ་ཞུགས་དུས་ལམ་འབྲས་བརྒྱུད་པའི་གསེར་སྐུ་ཉི་ཤུ་རྩ་ལྔ་ཙམ་དང། བྲིས་སྐུ་གྲངས་ལས་འདས་པ་དང། རྗེ་བཙུན་གོང་མ་མཐའ་དག་གི་བཀའ་འབུམ་སོགས་གསུང་རབ་དཔག་ཏུ་མེད་པ་བཞེངས། རབ་ཏུ་གནས་པ་དང་རྣམ་གཞག་རྒྱ་ཆེན་པོ་ཡང་ཡང་མཛད། དགོན་གོང་འོག་གཉིས་ཀྱི་གདན་ས་གཏད་རྗེས་སུ། སྤྱིར་ཆོས་གསན་པ་རྒྱ་ཆེ་མོད།