[A:410]རྗེས། གཅུང་བློ་གྲོས་རྒྱལ་མཚན་དཔལ་བཟང་པོ་ལ་གདན་ས་གོང་འོག་གཏོད་པ་མཛད་ནས། འོད་གསལ་རྩེ་མོར་སྒྲུབ་པ་ལོ་གཉིས་མཛད། སྐབས་དེར་རྒྱ་མ་རིན་པོ་ཆེ་གཞོན་ནུ་འོད་པའི་དྲུང་དུ། སེམས་ཙམ་ལུགས་ཀྱི་ཆོ་གས་བྱང་ཆུབ་སེམས་དཔའ་སྡོམ་པ་ཡང་དག་པར་བླངས། ནཱ་རོའི་ཆོས་དྲུག་དང། ཕྱག་ཆེན་ལྔ་ལྡན་གསན་ནས་ཐུགས་ཉམས་སུ་བཞེས། བཀའ་གདམས་ཀྱི་བསྟན་རིམ་ཆེན་མོ་དང། བཀའ་གདམས་ཐོར་བུ་བ་ལ་སོགས་པ་རྒྱ་མའི་ཆོས་སྐྱོང་སོགས་དང་མང་དུ་གསན་ནོ༎
མདོར་ན་སྐྱེས་བུ་དམ་པ་འདི་ནི། སྔོན་བསྐལ་པ་མང་པོར་ཐུགས་ཀྱིས་གཏོང་བ་ལ་མངོན་པར་དགའ་ཞིང་སེར་སྣ་མེད་པ་དང། གཞན་ལ་ཕྲག་དོག་མེད་ཅིང་སྐྱེ་བོ་མཐའ་དག་ལ་བྱམས་པ་དང། དགེ་བའི་བཤེས་གཉེན་ཡང་དག་པར་བསྟེན་པ་ལ་སྤྲོ་ཞིང། རབ་ཏུ་བྱུང་བ་དག་མཐོང་བ་ཙམ་གྱིས་དགེས་པ་ནི་སྔོན་གཞོན་ནུར་གྱུར་པའི་དུས་ཉིད་ནས་ཡིན་ལ། ཕྱིས་བསྟན་པ་རིན་པོ་ཆེ་ལ་ཞུགས་ཤིང། ཐུགས་རྒྱུད་སྦྱོང་བར་མཛད་པའི་ཐོག་མ་ཉིད་ནས་ཀྱང་དུལ་བ་དང། ཡང་དག་པར་སྡོམ་པ་དང། ཆོས་སྤྱོད་ཀྱི་རིམ་པ་མཐའ་དག་ལ་ངང་གིས་གཞོལ་བ་དང། མང་དུ་གསན་པ་ཚོལ་བ་ལ་མངོན་པར་སྤྲོ་བ་དང། མཁས་གྲུབ་ཀྱི་བཤེས་གཉེན་བསྟེན་པར་འོས་པ་དག་གང་ན་བཞུགས་ཞེས་ཡོངས་སུ་རྟོག་ཅིང། ཚོལ་བ་ལ་འགྲུས་པར་མཛད་དོ༎
དེ་དག་ལ་འདི་སྐད་ཅེས།
ཆེན་པོ་རྣམས་ནི་རིགས་མཐོ་དང༎
དགེ་ཞིང་གཙང་ལ་འབྱོར་པ་ཆེ།
ཆོས་ལ་བར་ཆད་མེད་གནས་སུ༎
སྨོན་ལམ་དབང་གི་སྐྱེ་བ་འཛིན༎
དེ་ནས་རི་རབ་ལྟ་བུ་ཡི༎
དགེ་བའི་བཤེས་ལ་བསྙེན་བྱས་ནས༎
ཐེག་གསུམ་པོ་ལ་རིམ་པ་བཞིན༎
ཞུགས་ནས་རྒྱལ་སྲས་ཆེན་པོར་མཚོན༎
དེ་ནས་རང་ལོ་ཉི་ཤུ་རྩ་བདུན་བཞེས་པའི་ཚེ། མཁས་བཙུན་བཟང་པོའི་ཁྲི་ལ་གཡོ་བ་མེད་བཞིན་དུ། རང་གཞན་གྱི་གྲུབ་མཐའ་རྒྱ་མཚོ་ཕ་རོལ་ཏུ་སོན་ནས། ཁྱབ་བདག་རྡོ་རྗེ་སེམས་དཔའི་ངོ་བོར་བཞུགས་པ། རྗེ་བཙུན་ཀུན་དགའ་བཟང་པོའི་ཞལ་སྔ་