[A:410]rjes/ gcung blo gros rgyal mtshan dpal bzang po la gdan sa gong 'og gtod pa mdzad nas/ 'od gsal rtse mor sgrub pa lo gnyis mdzad/ skabs der rgya ma rin po che gzhon nu 'od pa'i drung du/ sems tsam lugs kyi cho gas byang chub sems dpa' sdom pa yang dag par blangs/ nA ro'i chos drug dang/ phyag chen lnga ldan gsan nas thugs nyams su bzhes/ bka' gdams kyi bstan rim chen mo dang/ bka' gdams thor bu ba la sogs pa rgya ma'i chos skyong sogs dang mang du gsan no//
mdor na skyes bu dam pa 'di ni/ sngon bskal pa mang por thugs kyis gtong ba la mngon par dga' zhing ser sna med pa dang/ gzhan la phrag dog med cing skye bo mtha' dag la byams pa dang/ dge ba'i bshes gnyen yang dag par bsten pa la spro zhing/ rab tu byung ba dag mthong ba tsam gyis dges pa ni sngon gzhon nur gyur pa'i dus nyid nas yin la/ phyis bstan pa rin po che la zhugs shing/ thugs rgyud sbyong bar mdzad pa'i thog ma nyid nas kyang dul ba dang/ yang dag par sdom pa dang/ chos spyod kyi rim pa mtha' dag la ngang gis gzhol ba dang/ mang du gsan pa tshol ba la mngon par spro ba dang/ mkhas grub kyi bshes gnyen bsten par 'os pa dag gang na bzhugs zhes yongs su rtog cing/ tshol ba la 'grus par mdzad do//
de dag la 'di skad ces/
chen po rnams ni rigs mtho dang//
dge zhing gtsang la 'byor pa che/
chos la bar chad med gnas su//
smon lam dbang gi skye ba 'dzin//
de nas ri rab lta bu yi//
dge ba'i bshes la bsnyen byas nas//
theg gsum po la rim pa bzhin//
zhugs nas rgyal sras chen por mtshon//
de nas rang lo nyi shu rtsa bdun bzhes pa'i tshe/ mkhas btsun bzang po'i khri la g.yo ba med bzhin du/ rang gzhan gyi grub mtha' rgya mtsho pha rol tu son nas/ khyab bdag rdo rje sems dpa'i ngo bor bzhugs pa/ rje btsun kun dga' bzang po'i zhal snga