[A:132]གནང་ནས། རྗེ་བཙུན་འཇམ་དཀར་གྱི་བྲིས་ཐང་སྨན་བླ་དོན་གྲུབ་པའི་གཟབས་བྲིས་མ་ཆུང་ཆུང་ཞིག་ཡོད་པའི་དྲུང་དུ་མཆོད་པ་གསར་པ་རེ་བཤམས། པཎ་ཆེན་ཉིད་ཀྱང་རེ་ཤིག་དབུ་གཏུམས་ནས་ཐུགས་དམ་བཟླས་བརྗོད་ཀྱི་ཚུལ་རེ་དང། ཤ་ཤ་དྷ་ར་དང། རི་བོང་འཛིན་པ་ལྟར་དཀར་སོགས་སྐད་གཉིས་སྤེལ་བའི་འཇམ་དཀར་གྱི་བསྟོད་པ་དེ་གསུང་ནས༎ གང་ཡིན་པའི་ཐུགས་རྩོམ་ལ་འཇུག་པ་ཡིན་ནོ་གསུང་ཞིང། ཆོས་རྗེ་དྲུང་བཙུན་པ་ནི། ངས་བསམས་ན་མཆེད་པོ་ལོ་ཙ་བ་རང་ཡང་སངས་རྒྱས་ཀྱི་ཡེ་ཤེས་ཀྱིས་བཟུང་བའི་ཉན་ཐོས་མཆོག་གི་ཚུལ་འཛིན་པར་ཀ་འདུག། དིང་སང་སྡེ་པ་ཀུན་གྱི་ཡིག་མཁན་འདི་དག་ཉིན་རེ་བཞིན་དང། ཡི་གེའི་སྤོར་རྩོམ་གྱིས་དུས་འདའ་བར་འདུག་སྟེ། ཚིག་རེ་ནས་ལེན་པའི་སྡུག་བརྩིར་འདི་ལ། བསྟན་བཅོས་ཆེན་པོ་མཐའ་དག་ནི་ཐུགས་རྩོམ་ཤོག་ལོགས་རེ་ལན་རེ་ལས་སྐྱོར་མི་དགོས་པ་ཡ་མཚན་རྨད་དུ་བྱུང་བར་གོ། ཞེས་ལན་བརྒྱར་གསུངས་པ་ཐོས་སོ༎
དེར་རྒྱ་མ་ནས་གླང་ཐང་དུ་ཕེབས། དབྱར་སྔ་མ་ནས་ཞལ་བཞེས་གནང་ཞིང། སྔར་པཎ་ཆེན་རིན་པོ་ཆེ་མངའ་རིས་སུ་ལོ་གསུམ་བཞུགས་རིང་བསྟུད་མར་སེར་བས་ལོ་ཏོག་བཅོམ་པས་སྔགས་པ་མཐུ་བོ་ཆེས་སེར་སྲུང་ལ་བད་དགོས་པ་དེ་ལ། ད་ལོ་པཎ་ཆེན་རིན་པོ་ཆེ་བཞུགས་ཕྱིན་ལོ་གཉེར་གྱིས་གང་བྱེད་ཅེས་ཡུལ་མི་ཀུན་ངག་འཆམ་ནས་གཏད་མེད་དུ་བཞག་པས་ལོ་དགྲའི་རྣམ་པ་ཅུང་ཟད་ཀྱང་མ་བྱུང་བར། དེ་ལོ་ལས་ལོ་ལེགས་པ་མི་དྲན་པ་བྱུང་ངོ༎
དེར་དགེ་འདུན་ཚོགས་ཀྱི་དབུ་ལ་པཎ་ཆེན་རང་ཡང་ཕེབས་ནས། སྤྱན་སྔ་བློ་གྲོས་རྒྱལ་མཚན་པའི་དྲུང་དུ་ཐུབ་པ་དགོངས་གསལ་གྱི་བཤད་ལུང་ཞང་མདོ་སྡེ་དཔལ་བའི་དགོངས་འགྲེལ་དང་སྦྱར་བ་དང། ལོགས་སུ་པཎ་ཆེན་རིན་པོ་ཆེ་རང་གིས་གསང་འདུས་ཀྱི་འགྲེལ་བཤད། བུ་སྟོན་རིན་པོ་ཆེས་མཛད་པའི་མཐའ་དྲུག་རབ་