[A:131]བྱེས་ཀྱི་ཚོགས་པ་མ་ལུས་པ་ལ་ཟླ་ཕྱོགས་བཟང་བ་ཞིག་གི་བསྙེན་བཀུར་ཕུལ་ནས། ཆོས་ར་རིགས་ལུང་སོགས་ལྷག་པར་སྨར་བར་གནང་ཞིང། དེར་སྐུ་འཆག་པ་ལ་སྔོན་རྒྱ་མ་སངས་རྒྱས་དབོན་གྱི་གཙུག་ལག་ཁང་དེ་ཉིད་དུ་ཞབས་སྐོར་གནང་བའི་ཚེ། རེ་ཤིག་ཅིག་ནས་དྲུང་བཙུན་ཤེས་རབ་དཔལ་འབྱོར་བས་ཞབས་ཕྱི་ལ་སྐོར་བ་གནང་བས། སྐོར་བ་ལན་གསུམ་ཙམ་སོང་དུས། ག་རེ་གསུང་ནས། གཙུག་ལག་ཁང་སྔོན་གྱི་ཐོག་དཔངས་ཕལ་ཐོག་དགུ་ཙམ་ཡོད་པ་དེ་ལ་ཕྱག་བརྐྱངས་ནས་དེའི་ཤིང་བང་ཡོ་ལ་ཕྱག་རེག་སྟེ། འདི་ལྟར་ག་བང་རེ་རེའི་ནང་ན་ཡང་སངས་རྒྱས་ཀྱི་སྐུ་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རེ་རེ་དང། མཆོད་པ་ཆ་ཚང་བ་བཞུགས་པས་གསུང། སྟོན་པའི་གསེར་སྐུ་འཁྱིད་གང་པ་དང། སྔོན་གྱི་ཏིང་རྙིང་པ་འདྲ་ལ་ཕྱག་གཡོན་པའི་མཐིལ་དུ་བཞག་ནས། གཡས་པའི་མཐེབ་མཛུབ་ཀྱིས་སྒྲ་རྗེས་སུ་བསྐུལ་བར་མཛད་པ་དངོས་སུ་གཟིགས་པ་ལས། ཇི་སྲིད་ནས་བསམས་པས་སྐུའི་རྣམ་པར་འཕྲུལ་པ་བསྟན་པར་ཡིད་ཆེས་པའི་དད་པས་སྙིང་བརླན་བར་གྱུར་ཏེ། རང་གི་མཆེད་པོ་མཆོག་ཏུ་གྱུར་པ་དྲུང་ཡིགཡིད་ཆོས་རྒྱན་ལ་བཤད་པས། ཁོང་ན་རེ། རང་རེའི་བླ་མ་འདིའི་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པའི་གནས་འདི་སུ་ཞིག་གིས་བརྗོད་པར་སྤོབས། རེས་རྩོམ་ཡིག་དྲུང་དུ་བྱས་དུས། ཤོག་ལོགས་རེ་ཙམ་ཕྱག་ཐོགས་མེད་པར་ཞལ་པད་གནང་བ་དེ་འབྲི་བའི་རིང། བདག་གི་སྣང་ངོར་མནལ་བའི་རྣམ་པ་རེ་གནང་བས། ད་ཚིག་མཚམས་ཇི་ལྟར་ཡོད་བསམ་ནས་མནལ་སད་ཕྱིར་སྨྱུག་མས་ཐག་ཐག་བསྐུལ་བས། ཡང་སྔར་གྱི་དེ་རང་གི་ཐད་ནས་ཤ་རེ་བཀའ་སྩལ་ཞིང། དེ་ལྟ་བུའི་སྒྲིབ་མེད་དག་པའི་ཐུགས་དང་ལྡན་ཡང། གཞན་ངོར་ཐུགས་རྩོམ་ཆེ་བ་ཀུན་ལ་གལ་པོ་ཆེའི་ཆེད་དུ་