[A:56]དྲུང་གིས། དེ་དུས་སྐུ་ན་ཕྲ་བ་ཚུན་ངེས་འབྱུང་གི་བསམ་པ་སོགས་གསལ་མ་ཐེབས་པ་ཡང་སྲིད་པས་ཅིས་ཀྱང་ད་རེས་སྐྱོར་བ་ལེགས་ཞེས་བཀའ་ནན་བྱུང་ཡང། ངེས་འབྱུང་གི་བསམ་པ་སོགས་ཚད་མ་རྒྱུད་ལ་སྐྱེས་པའི་ངེས་ཤེས་བརྟན་པོའི་ཡིད་ཆེས་ཡོད་པས་གཏན་མི་སྐྱོར་བྱས་ནས་མགོ་ཁྲེགས་པོ་བྱས། དེར་བསྙེན་རྫོགས་ལས་མ་བསྒྲུབས་ཤེས་དང། ཕྱིས་བཀའ་ལས། རང་རེས་ཚིག་སྔ་མ་འདི་རྣམས་རོང་ཆེན་ཐམས་ཅད་མཁྱེན་པའི་ཞལ་སྔར་ཐོབ་པ་ཡིན་པས་གསུང་དཔའ་བོའི་གཙིགས་གཙིགས་མཛད་ཅིང། ཡང་བཀའ་ལས་ད་ལྟ་འདི་ན་རོང་སྟོན་ཆེན་པོ་ནས་བརྒྱུད་པའི་དགེ་ཚུལ་དང་རྩད་གཅོད་མི་རང་མི་འདུག་ཀྱང། ཁམས་ཚོ་ན་རྗེ་རོང་ཆེན་པའི་ཞལ་སློབ་བགྲེས་པོ་འགའ་རེ་བཞུགས་པ་ཁོང་གིས་གསན་ན་དགེས་ཡོང་བ་ཡིན་ཡང། གསུང་ངོ་ཞེས་ཡོངས་སུ་གྲགས་སོ༎
སྐབས་འདིར་རྣམ་ཐར་རྡོར་རྒྱལ་མར་དགུང་ལོ་ཉི་ཤུ་རྩ་ལྔའི་སྟེངས་སུ། ཆོས་ལུང་ཚོགས་པའི་མཁན་བརྒྱུད་ལས་བསྙེན་པར་རྫོགས་ཤེས་འབྱུང་བ་ནི་རྣམ་པར་མ་བརྟགས་པ་ཡིན་ཏེ། འདིར་ཁ་ཆེ་པཎ་ཆེན་ནས་རྡོ་རྗེ་དཔལ། འོད་ཟེར་དཔལ། བསོད་ནམས་དཔལ། བཀྲ་ཤིས་ཚུལ་ཁྲིམས་ཞེས་ཚོགས་བྱེ་རྫིང་པའི་མཁན་རིམས་སྨོས་ནས། བཀྲས་ཚུལ་བ་ལ་ཤར་པ་ཡེ་ཤེས་རྒྱལ་མཚན་པ། དེས་རྗེ་ངོར་པ། དེའི་དྲུང་དུ་བསྙེན་པར་རྫོགས་པས་སོ༎
ཡང་སྔ་མོའི་གསུང་སྒྲོས་འགའ་རེར་ངེད་རང་བསྙེན་པར་རྫོགས་པ་དེ་ལོ་ཉེར་དྲུག་ཡིན་ཀྱང། འདིར་ཚིག་གི་སྡེབས་སྦྱོར་ངོར་ཉེར་ལྔ་ཞེས་སྨོས་གསུང་བར་གྲགས་ཀྱང་དོན་ལ་མི་གནས་ཏེ། པཎ་ཆེན་རིན་པོ་ཆེ་ཉིད་དགུང་ལོ་ཉེར་དྲུག་གི་སྐབས། ཆུ་མོ་བྱའི་ལོ་vc: 1453བསྙེན་རྫོགས་ཞུ་བའི་ཡུལ་མཁན་པོར་གྱུར་པ་ཆོས་རྗེ་རྡོ་རྗེ་འཆང་ཆེན་པོ་དང། གྲིབ་ཚོད་པ་རྗེ་ཀུན་དབང་པ་གཉིས་གློ་བོ་བྲག་དཀར་ན་བཞུགས།