[A:477]ལ༎
ཀུན་འཛིན་ལ་སོགས་པ་འདས་ལོ་བསྲེ༎
དེ་ནི་དོན་གྲུབ་བལྟམས་པ་ནས༎
ད་ལྟའི་བར་གྱི་འདས་པའི་ལོ༎
ཞེས་བྱ་ལ། དེའི་སྟེང་དུ་ཡང་ལོ་ཉི་ཤུ་རྩ་དྲུག་བསྲེ་དགོས་པ་ཡིན་པ། དེའི་ཚེ་འབྲས་བུའི་དུས་ཀྱི་ལྔ་བརྒྱ་ཕྲག་གསུམ་དང། སྒྲུབ་པའི་དུས་ཀྱི་ལྔ་བརྒྱ་ཕྲག་དང་པོ་ཐལ་ནས། ལྔ་བརྒྱ་ཕྲག་གཉིས་པའི་ནང་ན་ཡོད་པས། འབྱུང་འགྱུར་ལ་སྒྲུབ་པའི་དུས་ཀྱི་ལྔ་བརྒྱ་ཕྲག་ཅིག་དང། བརྒྱ་ལྷག་ཙམ་དང། ལུང་གི་དུས་ཀྱི་ལྔ་བརྒྱ་ཕྲག་ཐམས་ཅད་ལྷག་མར་གནས་སོ༎ ཞེས་བྱ་བ་འདི་ཙམ་ཞིག་བཟུང་བར་བྱའོ༎
འདིར་དགེ་འདུན་གྱི་གྲངས་དང་བཤད་པ་ནི། ཤིང་མོ་ཡོས་ཀྱི་ལོ་ཧོར་ཟླ་དང་པོའི་ཚེས་གཅིག་གི་ཡང་ཞག་ཅིག་གི་སྔ་ལོགས་དེར། རྒྱལ་ཕུར་འཛོམ་པའི་ཉི་མ་ནས་བཟུང་སྟེ། ཉིན་ཞག་ཉི་ཤུ་རྩ་ཅིག་གི་རིང་ལ། དགེ་འདུན་གྱི་ཚོགས་སྟོང་བརྒྱད་བརྒྱ་ཙམ་འཚོགས། ཟུར་ཆོས་པ་དང་གཞུང་ལུགས་རབ་འབྱམས་ཏུ་སྨྲ་བ་བརྒྱ་ལྷག་ཙམ་དང། རིགས་གྲྭ་དང་ལུང་གྲྭ་ཆེན་མོར་གཏོགས་པ་སུམ་བརྒྱ་ཙམ་དང། དེ་ལྷག་གཞུང་འཛིན་གྱི་མཐའ་བརྟེན་པ་རྣམས་བྱོན་པ་ལ། ཐོག་མར་གནས་བརྟན་གྱིས་སེང་གེའི་ཁྲི་ལ་སོ་སོར་ཐར་པའི་མདོ་རྩོད་པ་ཞི་བྱེད་ཡན་ཆད་དག་པར་བཏོན་ནས་མཐུན་ཞིང་བཀྲ་ཤིས་པའི་གསོ་སྦྱོང་དང། ཉིན་ཐོག་ཐག་བཤད་པའི་བགྲོ་གླེང་དང། བཤད་པ་བྱེད་པ་མཐའ་དག་གི་དཔང་པོར་བྱེད་པ་དང། མཚན་ཐོག་ཐག་བགྲོ་གླེང་ལ་བཞེངས་པ་རྣམས་ཀྱི་དཔང་པོ་དང། སྟོན་པའི་རྣམ་ཐར་དང། ཆོ་འཕྲུལ་བསྟན་ཚུལ་གྱི་མདོ་འདོན་པ་རྣམས་བགྱིས་ལ། རྒྱལ་ཕུར་འཛོམ་པ་ལ་དབུ་ཚུགས་པ་ནས་བཟུང་སྟེ་ཡར་ངོའི་ཚེས་བཅུ་ཡན་ཞག་གྲངས་བཅུ་གསུམ་གྱི་རིང་ལ། སྡེ་སྣོད་འཛིན་པའི་བཤེས་གཉེན་མང་དུ་ཐོས་པ། རྣམ་དཔྱོད་ཀྱི་ཟུར་ཐོན་པ་དག་གི་སེང་གེའི་ཁྲི་ལ་གདུགས་དང། རྒྱལ་མཚན་བསྒྲེང་བའི་གནས་སུ་ཉིན་ཐོག་ཐག་བཤད་པ་མཛད་པ་ནི། ཉི་མ་