[A:478]དང་པོ་གཉིས་པ་ལ་སྡེ་བདུན་མདོ་དང། བཅས་པའི་བཤད་པ་དྲི་མ་ཅན་དུ་གྱུར་པ་རྣམས་སུན་ཕྱུངས་ནས། རང་རེའི་ལུགས་རིགས་པའི་གཏེར་དང་འཐུན་པར་འཇོག་པའི་ཚུལ་རྒྱས་པ་དང། ཡང་འདུལ་བའི་མདོ་དང་ཀརྨྨ་ཤ་ཏམ་གྱི་རྒྱས་བཤད་ལ། དྲི་མ་ཅན་དུ་གྱུར་པ་སུན་འབྱིན་དགོས་པ་ཆེར་མེད་ཀྱང། དཔྱིས་ཕྱིན་པའི་བཤད་པ་རྒྱས་པ་དང། ཡང་ཆོས་མངོན་པ་གོང་མ་ལ་ཁ་བ་ཅན་དུ་ཕྱིས་ལོག་པར་སྒྲོ་འདོགས་པ་མ་བྱུང་ཡང། སྔོན་དུས་སུ་ཉན་བཤད་ཤིན་ཏུ་དར་བས་སྒྲོ་སྐུར་དུ་གྱུར་པ་དག་སུན་འབྱིན་པ་དང། རང་ལུགས་དཔྱིས་ཕྱིན་པའི་ལུང་རིགས་ཀྱི་རྣམ་བཤད་རྒྱས་པ་དང། མངོན་པ་གོང་མ་ལ་ཕྱིས་དང་སྔོན་གང་དུ་ཡང་ལོག་པར་བཤད་པ་ཤིན་ཏུ་ཉུང་ཡང། འགྲེལ་པ་དང་འགྲེལ་བཤད་བྱིངས་ཆེ་བའི་སྟོབས་ཀྱིས་བཤད་པ་ཟུར་ཐོན་པ་འཆད་ཤེས་པ་བོད?པོད་གཞན་གྱི་རྣམ་བཤད་ན་མི་སྣང་བ། གྲུབ་མཐའ་ཟུར་ཕྱིན་པར་འཆད་པའི་རྣམ་བཤད་རྒྱས་པ་དང། དབུ་མ་ཐལ་རང་གི་གཞུང་འགྲེལ་གྱི་ཚོགས་རྣམས་ཐད་སོར་བཞག་ནས་ངེས་དོན་གྱི་བག་ཆགས་ཡོད་པ་རྣམས་ལ་འཆད་ཤེས་པ་སླ་བ་ལྟ་བུར་སྣང་ཡང། ཁ་བ་ཅན་དུ་ཕྱིས་ངེས་དོན་འཁྱོག་པོར་འདྲེན་པའི་གླེགས་བམ་གྱི་ཚོགས་ཤིན་ཏུ་ལྕིབས?ལྕི་བས་ནོན་པའི་སྐབས་འདིར། གཞུང་འགྲེལ་གྱི་རྣམ་བཤད་ལྷད་མ་ཞུགས་པ་དང། ཕྱིས་ཀྱི་བཤད་པ་སོ་སོར་འབྱེད་པའི་རྣམ་བཤད་རྒྱས་པ་དང། བྱམས་ཆོས་རྣམ་ལྔའི་ཚིག་དང་ངེས་དོན་གྱི་འགྲེལ་ཚུལ་ཐོགས་མེད་ཀྱིས་བཀྲལ་བ་འདི། ཆོས་བདག་པོ་ཉིད་ཀྱིས་བཀྲལ་བའི་བཤད་པ་ཡིན་ཀྱང་ཕྱིས་གངས་ཅན་ན་དབུ་མ་ཐལ་འགྱུར་བ་ཉིད་མཆོག་ཏུ་སྒྲུབ་པའི་བསམ་པས་བྱམས་པའི་ཆོས་འཁྲུལ་པའི་འདམ་དུ་བཅིངས་པ་དག་གྱེན་དུ་འདེགས་པའི་རྣམ་བཤད་རྒྱས་པ་དང། རྗེ་བཙུན་ས་སྐྱ་པའི་གཞུང་ལོག་པར་འཆེད?འཆད་པ་རྣམས་སུན་འབྱིན་པའི་རྣམ་བཤད་རྒྱས་པ་དང། གཞང་ཡང་གསུང་རབ་སྤྱིའི་འཆད་ལུགས་གསང་སྔགས་ཟབ་མོའི་ངེས་དོན། ཆོས་འཁོར་