[A:461]ཉིད་ཀྱིས་རབ་ཏུ་གནས་པར་མཛད་པ་དེ་སྤྱན་དྲངས། དེའི་བྱིན་རླབས་ཀྱི་མཐུ་ལས་ཆོས་རྒྱལ་ཁྲི་སྲོང་སྡེའུ་བཙན་གྱིས་བྱང་ཆུབ་སེམས་དཔའ་ཞི་བ་མཚོ་དང། སྤྲུལ་པའི་སྐུ་པདྨ་འབྱུང་གནས་སྤྱན་དྲངས། བཻ་རོ་ཙ་ན་དང། ཀ་ཅོག་ཞང་གསུམ་ལ་སོགས་པ་སྤྲུལ་པའི་ལོ་ཙཱ་རང་གི་ངང་གིས་བྱོན། སྡེ་སྣོད་གསུམ་དགོངས་འགྲེལ་དང་བཅས་པ་གསང་སྔགས་ཕྱི་ནང་གི་ཆོས་མང་དུ་བསྒྱུར། ཨཽཏནྟ་པུ་རིའི་བཞེངས་ཚུལ་དང། ཐོས་བསམ་སྒོམ་གསུམ་གྱི་གྲྭ་ཆེན་པོ་ཇི་ལྟར་ཡོད་པའི་ཚུལ་དཔེར་བླངས་ནས། དབུས་སུ་རྡོ་རྗེ་དབྱིངས་ཀྱི་གཞལ་ཡས་ཁངས་ཆེན་པོ་རི་རབ་དང་མཚུངས་པ། མཐའ་བསྐོར་དུ་གླིང་བཞི་གླིང་ཕྲན་བརྒྱད་དང་མཚུངས་པའི་གཙུག་ལག་ཁང་སོ་སོར། སྡོམ་པ་འབོགས་ལེན་གྱི་གྲྭ་དང། འདུལ་བའི་ཁྲིམས་ཀྱིས་བརྟུལ་ཞུགས་ལ་ཡང་དག་པར་གནས་པའི་གྲྭ་དང། ཆོས་བསྒྱུར་བ་དང། འཆད་པའི་གྲྭ་དང། གསང་སྔགས་ཀྱི་དབང་དང་ཉམས་སུ་ལེན་པའི་སྒོམ་སྒྲུབ་ཀྱི་གྲྭ་སོ་སོར་བཙུགས་ནས་བསྟན་པའི་སྒོ་མ་ལུས་པ་མཐའ་དག་ཉི་མ་ཤར་བ་ལྟ་བུར་མཛད་དོ༎
དེའི་འོག་ཏུ་མངའ་བདག་ཁྲི་རལ་པ་ཅན་གྱིས་ཡབ་མེས་ཀྱིས་བསྒྱུར་བའི་ཆོས་ཇི་སྙེད་པ་སྐད་གསར་བཅད་ཀྱིས་གཏན་ལ་འབེབས་པ། མངའ་རིས་ཀྱི་རབ་བྱུང་ཇི་སྙེད་པ་བསྡུས་ནས་ཞབས་སྤྱི་བོར་ལེན་པ། ཆོས་ཀྱི་སྒོ་དུ་མ་ནས་བགྲོ་བ་དང་གླེང་བ་དང། རབ་ཏུ་བྱུང་བ་རེ་རེ་ལ་འབངས་མི་ཁྱིམ་བདུན་བདུན་འབུལ་བ། ཡབ་མེས་ཀྱི་ལྷ་ཁང་ལས་བཀོད་པ་ཁྱད་པར་དུ་འཕགས་པའི་གཙུག་ལག་ཁང་བཞེངས་པ་རྣམས་དུས་ཅིག་ཆར་དུ་མཛད་པར་གྲགས་པ་དང། དེ་ལྟར་ན་ཆོས་རྒྱལ་མེས་དབོན་རྣམ་པ་གསུམ་གྱིས་སྟོན་པའི་སྐུ་དང། བསྟན་པའི་གཞི་འཛུགས་པ། བར་དུ་རབ་ཏུ་བྱུང་བ་དང་བསྟན་པ་མ་ལུས་པའི་སྒོ་དར་ཞིང་རྒྱས་པར་མཛད། ཐ་མར་བསྟན་པ་