[A:462]དང་བསྟན་འཛིན་ལ་མཆོད་པ་དང་རི་མོར་བྱ་བ་སྟེ། ཁ་པ་ཅན་དུ་བསྟན་པ་སྔ་དར་གྱི་ཆོས་ཀྱི་འཁོར་ལོ་རིམ་པ་གསུམ་བསྐོར། དེ་ནས་རྒྱལ་པོ་དར་མས་བསྟན་པ་བསྣུབས་པའི་རྐྱེན་གྱིས། དབུས་གཙང་དུ་སྡོམ་པའི་བཤད་བཀའ་མེད་པ་ལོ་གྲངས་བདུན་ཅུ་ལྷག་ཅིག་བྱུང་བར་གྲགས་པ་དེའི་ཚེ་ཡང་སྡེ་སྣོད་གསུམ་དང། རྒྱུད་སྡེ་འོག་མའི་བཤད་བཀའ་ཆད་པར་གྱུར་ཀྱང། སྤྲུལ་པའི་སྐུ་པདྨ་འབྱུང་གནས་ཀྱིས་གསང་སྔགས་གང་ཟག་སྙན་བརྒྱུད་དང། རིག་འཛིན་བརྡ་ཡི་བརྒྱུད་པ་དང། རྒྱལ་བ་དགོངས་པའི་རྒྱུད་ཁྱིམ་པའི་ཚུལ་གྱིས་ཉམས་སུ་ལེན་པ་དང། རྒྱ་གར་ལ་ཁུངས་བྱུང་བའི་བསྟན་བཅོས་རྩོམ་པ་དང། གདུག་པ་ཅན་ཚར་གཅོད་པར་ནུས་པའི་རིག་པ་འཛིན་པ་མང་པོ་དག་ནི་རྒྱུན་མ་ཆད་པར་བཞུགས་སོ༎
དེ་ལྟ་ན་ཡང་སོ་སོར་ཐར་པའི་ཚུལ་ཁྲིམས་དང། དམ་པའི་ཆོས་ཀྱི་ཉན་བཤད་ཕྱིས་དར་བའི་ཐོག་མ་ནི། དབུས་གཙང་གི་མི་བཅུས་མདོ་ཁམས་སྨད་ནས་རབ་ཏུ་བྱུང་བ་དང་བསྙེན་པར་རྫོགས་པའི་སྡོམ་པ་ཡང་དག་པར་བླངས། དགེ་འདུན་གྱི་སྡེ་སོ་སོར་བཙུགས། དེ་ནས་སོ་སོར་འཆད་པའི་དགེ་འདུན་གྱི་སྡེ་ཤིན་ཏུ་མང་ཞིང། དམ་ཆོས་འདུལ་བའི་བཤད་ཉན་རྒྱས་བསྡུས་ཅི་རིགས་པར་བྱུང་བ་དེ་ནས་བཟུང་སྟེ། དེང་སང་གི་བར་དུ་ལོ་གྲངས་བརྒྱ་ཙམ་ཆོས་འདུལ་བའི་བསྟན་པ་ལ་བར་ཆད་མ་བྱུང་ངོ༎
ཉན་བཤད་ཕྱི་དར་གྱི་ཐོག་མ་ནི། ལོ་ཙཱ་བ་ཆེན་པོ་རིན་ཆེན་བཟང་པོས་ཡུལ་ཁ་ཆེ་ལ་སོགས་པར་བསླབ་སྦྱངས་མཐར་ཕྱིན་པར་མཛད། སྔོན་མེད་པའི་ཆོས་མང་པོ་གསར་དུ་བསྒྱུར། ཡོད་པ་ལ་ཞུས་ཆེན་མཛད། གསང་སྔགས་ཀྱི་བསྟན་པ་དར་ཞིང་རྒྱས་པ་དང། སྔགས་ལོག་སུན་འབྱིན་ཞེས་བྱ་བའི་བསྟན་བཅོས་མཛད། སྐུ་ཚེ་དེ་ལ་མཆོག་གི་དངོས་གྲུབ་བརྙེས། དུས་འདི་ནས་བོད་དུ་གསང་སྔགས་གསར་རྙིང་