[A:52a]mtshungs pa'i rnam gzhag de tsam la rten par byed do/ /de ltar na rig pa'i gnas rnam pa lnga shes par khas 'che ba'i gang zag de su yin zhes 'dri na/ sa skya pa ste zhes lan gdab bo/ /de'ang dpal sa skya'i gtsug lag khang na gnas pa shAkya'i dge slong kun dga' rgyal mtshan dpal bzang po zhes bya ba de yin no/ /mkhas pa gzhan dag gzugs brnyan yin/ /zhes smras pa yang sngar ji skad smos pa'i shes bya de dag gi don phyin ci ma log par shes pa lta smos kyang ci dgos/ ming tsam yang ma thos shing rnam pa tsam yang blo la ma shar ba bzhin du shes bya phyogs re tsam ne tso'i 'don pa ltar 'dris kyi/ rang gis legs par shes par khas 'che ba de nyid la yang sgra dang / tshad ma dang / sdeb sbyor dang / snyan ngag dang / tshig gi rgyan dang / tshig gi rnam par dbye ba dang / bsdu ba la sogs pa'i sgo nas brtsad cing dris na/ chos dang mthun par lan 'debs pa la lug ltar lkugs par gyur bzhin du mngon pa'i nga rgyal gyis rang mkhas par khas che la/ gzhan yongs su rdzogs pa'i mkhas pa dag la skur pa 'debs shing mi snyan par brjod pa tsam gyis 'phrin las grub par 'dod pa'i mkhas par grags pa de dag gzugs brnyan dang 'dra ba yin te/ chu nang du shar ba'i zla ba'i gzugs zla ba dang 'dra ba bzhin du zad kyi zla ba'i don byed pa ni ma yin no/ /legs par shes pa'i mkhas pa gzhan dag gzugs brnyan dang 'dra ba ga la srid de/ lha dang bcas pa'i 'jig rten thams cad kyi ston par 'os pa rgyal ba thams cad kyi thugs kyi sras yin no/ /de ltar rang