[A:52b]gi rnam par thar pa cung zad bshad pa 'di dag kyang rgya gar gyi paNDi ta shes bya rig pa'i gnas lnga yongs su rdzogs pa rnams dang / bod kyi'ang gzhung dang don gyi cha legs par dpyis phyin par shes shing / shes bya thams cad la shes rab 'jug pa la 'bel ba'i gtam la kun nas dga' ba/ bdag la yun ring du brtsad cing dris pa gzu bor gnas pa de dag gis bdag gi rang bzhin shes par zad kyi/ rang gi blo la khyab pa bsgrubs nas phyogs kyi chos gzhan gyi shes rab la sbyor ba'i blun po de dag gam/ sgra'i sbyor ba phyogs re tsam dris pa'am/ tshad ma'i sbyor ba'i skor 'ga' re tsam la brtsad pa'am/ lung dang man ngag gi gnad 'ga' re tsam la dris gtugs cung zad byas pa tsam gyis bdag gi yon tan gyi mtha' rtogs par dka'o zhes gsungs shing / dpe'i sgo nas kyang bsngags pa brjod pa ni/ shes bya'i mkha' la thogs pa med rgyu zhing / /phas rgol nyi zla'i gzi brjid bza' nus kyang / /rtag tu skye bo kun gyis ma mthong bas/ /kun dga' rgyal mtshan nam mkha'i sgra gcan 'dra/ /zhes gsungs so/ /rnam par thar pa 'di lta bu rnams kyang nga rgyal gyi sgo nas gzhan la zur za ba ma yin gyi/ sngon gyi mkhas pa chen po rnams kyis kyang dgos pa dang bcas te gsungs so zhes ston pa ni sngon gyi mkhas pa chen po dpal ldan chos kyi grags pa dang / blo gros brtan pa dang / shes rab 'byung gnas sbas pa dang / shaM ka ra nanda dang / smra ba'i seng ge la sogs pa mkhas pa chen po byon zin pa de dag la nga rgyal mi mnga' bar zin yang / rang rang gi rnam par thar pa bshad