[A:53a] pa'i tshigs su bcad pa mdzad do/ /'di dag bsgrags pas ma 'ongs pa'i mkhas pa chen po rnams dang / slob grwa'i mkhas pa don du gnyer ba rnams kyis de dag gi rnam par thar pa khong du chud par 'gyur ba dang / blun po yon tan phyogs re tsam gyis chog par 'dzin pa'i blo 'dor ba dang / blo gsal ba'i gzhon nu dag kyang 'di lta bu'i mkhas pa chen por gyur na ci ma rung snyam du spro ba bskyed par bya ba'i phyir/ nga rgyal gyi tshig gsungs pa lta bur mngon pa yod de/ slob dpon dpal ldan chos kyi grags pas/ spre'u'i tshogs kyis ri bo bzung nas chu gter bzhag ces grog mkhar smras/ /rgyas pa srid sgrub brda shes de dag bden min lo rgyus sgrog par byed/ /kho bos tshig don srang la gzhal bzhin ji ltar gnas pa bden smras kyang / /'gro kun mgrin pa brkyangs nas sun 'byin de phyir grags ldan khyed la 'dud/ /ces gsungs pa dang / yang / gal te chos kyi grags pa yis/ /smra ba'i nyi ma nub pa na/ /chos ni gnyid log yang na shi/ /chos ma yin rnams da gzod long / /zhes gsungs la/ slob dpon blo brtan gyis/ bdag blo phyogs gcig bzhag pa dang / /gzhan blo phyogs gcig bzhag pa gnyis/ /gal te tshad la gzhal rung na/ /srang la bcal na bdag blo lci/ /zhes gsungs pa dang / slob dpon shes rab 'byung gnas sbas pas kyang / /rig pa'i 'od zer stong gis brgyan pa yis/ /shes rab 'byung gnas blo yi nyi ma 'char/ /mu stegs blo ngan mtshan mo rab rgyu ba'i/ /rgyu skar me khyer tshogs rnams rab tu bros/ /