[A:56b]pa'i phyir mi ldog pa'i mtshan nyid dag yin no zhes gsal bar gsungs pa las shes so/ /yang 'dir dag pa'i gdul bya phal po che'i snang ngor sku'i skye ba 'di dang / rig pa 'dzin pa mkha' la gnas pa dang / rgyal po nyi ma'i stobs 'phel gyi sras su 'khrungs pa ste/ skye ba gsum gyi thogs pa'i 'phags par bshad la/ don gyi gnas tshul la ni/ yang dag par rdzogs pa'i sangs rgyas 'jam pa'i dbyangs nyid yin pas/ mkhyen pa dang rtogs pa'i yon tan du snang ba 'di rnams kyang rnam par 'phrul pa nyid du go bar bya'o/ /gsum pa bstan pa dang sems can gyi don ji ltar mdzad pa'i tshul la gnyis te/ mkhas pa'i bya ba gsum gyis bstan pa rgyas par mdzad pa'i tshul dang / rgyal bas lung bstan pa'i sa'i cha byang phyogs hor gyi yul du bstan pa rgyas par mdzad pa'i tshul lo/ /dang po la gnyis te/ mkhas pa'i bya ba gsum gyis bstan pa rgyas par mdzad pa'i tshul dang / phrin las sna tshogs pas gzhan gyi don mdzad pa'i tshul lo/ /dang po la gsum las/ 'chad pa nyi ma'i 'od zer gyis phan bde'i pad tshal rgyas par mdzad pa'i tshul ni/ bdag nyid chen po 'dis sngar bshad pa'i tshul ltar chos rnams kyi rang dang spyi'i mtshan nyid phyin ci ma log pa legs par mkhyen pas/ sku tshe dpag tu med pa'i sngon rol nas skye dgu ma rig pa'i ling thog gis blo gros kyi mig nyams nas/ blang dor 'chol pa'i gom stabs 'chor bas srid pa'i gcong rong nyam nga bar lhung ste/ mi bzad pa'i sdug bsngal gyis gdungs pa rnams la bu gcig pa chu klung gis khyer