[A:134b]pa gzhan dag la 'jug par gyur/ sa'i lha yang spro ba med bas lo thog gi khyad par rnams kyang smin par ma gyur to/ /de ltar nyi ma'i dkyil 'khor 'od kyi dra ba can nub kyi ri rtser nye bar gyur pa na/ grib ma'i tshogs rnams sngon du nye bar 'ong ba bzhin/ bdag nyid chen po 'di yang zhing gzhan du bzhud par dgongs pa'i mod la yang / snga ltas de dag glo bur du lhags par gyur te/ de yang gang zag dam pa thams cad gzhan du bzhud par dgongs pa na snga ltas de dag 'byung ba ni chos nyid de/ skye dgu rnams kyi bde skyid kyi khyad par thams cad ni skyes bu dam pa 'di lta bu la rag las la/ 'di ni gzhan du bzhud par dgongs shing / de tshe skye dgu thams cad la de lta bu'i ltas byung yang / bdag nyid chen po ni bde ba can na de bzhin gshegs pa a mi de ba padma rA ga'i ri bo ltar kun nas brjid pa'i zhabs kyi drung na byang chub sems dpa'i tshogs du mas kun tu bzang po'i mchod pa'i sprin gyi phung po chen pos mchod pa byed pa la sogs pa sangs rgyas kyi zhing rnam par dag pa du ma'i bkod pa yang thugs dam du gzigs pa'i snang ba byung zhing / khyad par 'brug lo zla ba bcu pa'i tshes gsum gyi mtshan mo/ dpal gyi ri la slob dpon chen po klu sgrub byang chub kyi shing rgya dang tshad gzhal bar dka' ba'i zhabs kyi drung na bzhugs pa la/ bdag nyid dbu ma rigs pa'i tshogs drug la sogs pa gsan cing / nam mkha' las lha'i bu mo du mas mchod pa'i khyad par dpag tu med pas mchod pa byed pa dang / rig pa'i rgyal mo rma bya chen mo mngon sum du bzhugs pa rnams rmi lam du