[A:210b]te/ gong du 'pho ba'i ting nge 'dzin gyi ngang la mnyam par 'jog pa mdzad de rgyud sde rnams nas bshad pa bzhin/ lha dang rig pa 'dzin pa dang dpa' bo mkha' 'gro'i tshogs kyis bsus nas/ 'ja' dang / 'od dang / me tog gi char dang / rol mo'i sgra dang lha'i spos kyi dri zhim po la sogs pa kun gyi mthun snang du grub pa'i ltas dpag tu med pa dang bcas pas/ re zhig gzugs kyi sku chos kyi dbyings su bsdu bar mdzad cing / de'i tshe dbu'i gtsug tor gsal por 'phags pa dang / gsang pa'i gnas bltar mi mngon pa dang / byang sems gser gyi kha dog lta bu zhal dang shangs nas byon pa la sogs pa ltas khyad par can dpag tu med pa byung zhes grags shing / de ltar sku zhi bar gshegs pa'i tshul bstan nas kyang yun ring po'i bar du nam mkha' la 'ja' 'od kha dog sna tshogs pa 'khrigs shing me tog kha dog dang dbyibs kyi khyad par mi 'dra ba du ma rgyun ma chad par babs pa la sogs pa ngo mtshar ba'i ltas bsam gyis mi khyab pa byung zhes bshad do/ /
dharmA dhwa dza
de lta bu'i bdag nyid chen po theg chen kun dga' bkra shis kyi yab ta dben chos kyi rgyal mtshan zhes bya ba de'i btsun mo gnyis pa yul nyang stod ma/ ming ma gcig sras skyabs bya ba la sras sku mched gnyis 'khrungs pa'i che ba dharmA dhwa dza zhes bya ba lcags mo yos kyi lo la sku 'khrungs te/ skyes stobs kyi shes rab phun sum tshogs pa dang ldan zhing / bdag chen kun dga' rin chen zhes bya ba gzhi thog pa mkhas btsun chen po'i sras de nyid dang / ma ti paN chen gnyis kyi drung du rab tu byung nas/ de nas chos rje gzungs pa'i drung du