[A:232a]ga'i phreng ba sogs mdor na sngon med pa'i legs bshad kyi tshogs glegs bam du longs pa mdzad de/ 'di dag kyang ming mngon brjod kyis spras pas bying che/ tshig snyan ngag gis brgyan pas rna bar snyan/ don brjod bya dang 'brel bas rtogs sla/ gcod mtshams sdeb sbyor dang mthun pas brjod bde ba la sogs pa bstan bcos rtsom pa'i yon tan thams cad tshang bas mkhas pa rnams kyi yid 'phrog par byed pa kho na ste/ ji skad du/ gzhung brgya 'chad pa'i lce bde blo gsal zhing / /lung rigs 'gal 'brel dpyod pa'i 'dren byed yang / sdeb legs rtsom pa'i ro 'dzin bsgyur mkhas pa'i/ /gnas lnga rig pa dpal ldan sa skya pa/ /blo bzang khyod kyi mkhyen pa'i ded dpon gyis/ /mkhas grub zhal gyi chu gter las blangs pa'i/ /dbang lung man ngag yid bzhin rin chen gyis/ /zab yangs thugs kyi bang mdzod legs bkang nas/ /slar yang skye dgu'i dbul ba sel ba'i phyir/ /rgyud sde rnam bzhi'i dgongs don rin chen mchog /rdo rje phreng ba kr-i ya sa mutstshar/ /legs par bshad pa'i dkyil 'khor zhe lnga dang / /ngan song sbyong ba'i dkyil 'khor bcu dang gnyis/ /rnam dag zur bka' lnga bcu rtsa gcig ste/ /smin byed dbang gi rnam grangs brgya dang brgyad/ /grol byed khrid kyi rim pa nyi shu bdun/ /snyan brgyud zab mo'i byin rlabs nyer gnyis lhag /rjes su gnang ba'i bka' srol chen po gnyis/ /rjes gnang zur bkar grags pa bzhi bcu lhag /rgya bod mkhas pa'i dgongs 'grel dang bcas pa'i/ /zab rgyas rgyud sde'i bshad bka' bcu