[A:272a]dang nye ba rdo rje phur pa'i sgrub mchod tshugs par brtsams pa na/ de nyid kyi gar 'chams/ bris thig dbyangs rol sogs gdung sras sku mched gnyis kyis thog drangs 'dus pa'i tshogs rnams la sngar las kyang zhib cing mtha' chod par stsal nas/ 'das ma 'ongs kyi bslab bya lung bstan mtha' yas pa zhig mdzad cing / lo de'i phur pa sgrub mchod kyis 'dul gyi gar 'chams kyi rol dpon la yang phebs te/ de dus 'khon rog gi thugs dam ma'i rdo rje phur pa'i sku brnyan nang du bzhugs pa'i bcom ldan 'das rdo rje gzhon nu'i sku mi tshad tsam zhig kyang gsar du bzhengs nas sngags 'chang nyid kyis phyag nas dang bkra shis mnga' gsol rgyas par mdzad de ma 'ongs pa'i gdul bya rnams 'phrin las gong 'phel du 'gyur ba'i rten 'brel thams cad sgrig par mdzad pa yin no zhes thos la/ de skabs nas gzhan ngor gsol dwangs zhan pa'i rkyen gyis sku shed je chung je chung la song ba'i tshul bstan pa na/ bdag nyid chen po dpon slob nyung shas shig gis lhun grub pho brang du sku mtshams ha cang dam pa ma yin pa zhig mdzad nas bzhugs pa'i tshe/ zhabs 'bring pa rnams kyis deng sang mtshan ltas la sogs pa ji ltar byung / sku shed ji chung du 'gro ba 'di la blo bde ba zhig gtan nas mi 'dug pas/ lo 'di la sku dog bzhin ni med lags sam zhes zhus pa na/ rje nyid kyi gsung las/ deng sang rmis ltas la sogs pa gang yang ma byung / kha sing lam 'bras bshad pa'i skabs snga dro khri steng du lam dus len gyis bsdad pa'i tshe/ nam mkha' nas dar sna lnga ring