[A:320b]mo yos nas/ bdun cu bzhes pa shing mo phag gi bar lo grangs lnga bcu rtsa bdun rje nyid kyis gdan sa mdzad cing / rje btsun chen po gshegs pa'i phyi lo chos rje sa paN dgung lo so drug tsam du phebs pa me pho byi ba nas/ drug cu re gcig tsam bzhes pa chu mo yos kyi bar lo grangs nyer brgyad bdag nyid chen po nyid kyis gdan sa mdzad/ de nas shing pho 'brug sa paN hor yul du phebs pa'i lo de nas/ shing pho byi ba'i khor lo nyi shu rtsa gcig dkar shAkya grags kyis gdan sa mdzad par mus srad pa'i gdung rabs las 'byung la/ yang ya rabs kha rgyan gyi mchan bur/ kha cig gis dkar shAkya grags bgrangs pa ni gdan sa pa dang zur chos pa'i shan ma phyed pa ste/ sa paN hor yul la phebs dus shar ba ye 'byung dang / /'u yug pa ma gtogs thams cad kyis shAkya bzang po la phyag 'tshol/ khyed gsum blo mthun gcig tu gyis la gdan sa 'di 'phags pa spun la 'phrod pa gyis gsungs pa'i bka' phebs zhes yig tshang rnying ma rnams las gsungs pa dang mi mthun pas so zhes 'byung ba ltar na bdag nyid chen po sa paN hor yul phebs pa'i skabs su/ gdan sa pa logs su ma bkod par gdan sa chen po'i gang spyi'i bstan pa'i khur rnams shar ba shes rab 'byung gnas/ 'u yug pa rig pa'i seng ge shAkya bzang po dang gsum gyis khur te/ de dag gi ring la lo grangs nyer gcig 'das par snang zhing / lo de 'phags pa rin po che dgung lo so gcig tsam du phebs pa shing mo glang gi lo ste/ de dang me pho stag gnyis chos rgyal 'phags pas gdan sa mdzad ces 'chad dgos par snang