[A:49a]dang / nor rgyas la sogs pa lta bu yin no/ /gtan tshigs rig pa la mkhas pa'i tshul ni/ de'i bstan bcos rigs pa'i gzhung lugs kyi gtso bo tshad ma'i mdo kun las btus pa dang / de'i tshig gi don gtan la 'bebs pa'i rab tu byed pa sde bdun yan lag dang bcas pa phyin ci ma log par mkhyen pas rang gzhan sde pa'i rgol bas glang po skyes stobs shes rab kyi lus rags shing nga rgyal gyi stobs rgyas pa/ lung dang rig pa ltar snang gi mche ba rnon pos blun po grub pa'i mtha' rnam par dpyod mi shes pa'i dpung gi tshogs zil gyis gnon par nus pa dag kyang / phyin ci ma log pa'i mkhyen pa'i lus stobs yongs su rdzogs shing / bde bar gshegs pa'i gsung rab ral pa'i khur gyis rab tu ljid la/ rang lugs bsgrub pa dang / gzhan lugs sun 'byin pa'i mche sder rnon pos grub mtha' ngan pa'i klad khrag ma lus pa rtsa ba nas 'don zhing / bdag med pa dang stong pa nyid kyi sgra chen po kun tu sgrogs pa la rnam pa kun tu bag tsha ba med pa/ rig pa'i dbang phyug dpal ldan chos kyi grags pa dang / 'phags pa klu sgrub la sogs pa lta bu yin no/ /bzo rig pa la mkhyen pa rgyas pa'i tshul ni/ ri mo dang / sku gzugs kyi mtshan nyid dang / chag tshad dang / de dag gi dge legs la sogs pa'i brtag pa dang / sa brtag pa la sogs pa'i brtag pa rnam pa brgyad dang / rtsis kyang bzo rig pa'i khongs su mkhas pa rnams kyis gsungs pas/ dpal dus kyi 'khor lo las gsungs pa'i aM ka dang / dbri bsnan dang /'god bsgyur