[A:32]རིགས་རྗེས་སུ་གཟུང་བའི་ཕྱིར། །རྡོ་རྗེ་འཛིན་པ་ཉིད་ཀྱིས་ནི། །རྒྱུད་སྡེ་རྣམ་པ་བཞིར་བཤད་དོ། །ཞེས་སོ། །ཡང་གང་ཟག་སྦྱངས་པ་དམན་པ་དང༌། ཕྱི་ལུས་ངག་གི་བྱ་བ་ཁྲུས་ལ་སོགས་པར་དགའ་བ་དང༌། འབྲིང་ཕྱི་ལུས་ངག་གི་བྱ་བ་དང༌། ནང་ཏིང་ངེ་འཛིན་གཉིས་ཀ་ལ་སྤྱོད་པ་དང༌། མཆོག་ཏིང་ངེ་འཛིན་ཁོ་ན་གཙོ་བོར་སྤྱོད་པ་དང༌། ཆེས་མཆོག་ཏུ་གྱུར་པ་ཏིང་ངེ་འཛིན་གྱི་ཁྱད་པར་གོང་ན་མེད་པ་གཙོ་བོར་སྤྱོད་པ་ལ་དགའ་བ་རྣམས་ཀྱི་དོན་དུ་རྒྱུད་སྡེ་བཞིར་ངེས་པ་ནི། རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག ། རྣལ་འབྱོར་བླ་མེད་དེ་ལྟག་ལ། །ཞེས་སོ། །ལྔ་པ་རྒྱུད་སྡེ་བཞི་པོ་དེར་སྨིན་བྱེད་ཀྱི་དབང་བསྐུར་མི་འདྲ་བ་བཞི་ཡོད་པས་རྒྱུད་སྡེ་བཞིར་ངེས་པ་ནི། བྱ་བའི་རྒྱུད་ལ་སོགས་པ་བཞི་པོ་རིམ་པར། ཡེ་ཤེས་ཐིག་ལེ་ལས། ཆུ་དང་དེ་བཞིན་ཅོད་པཎ་དབང༌། །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང༌། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་སློབ་དཔོན་དབང༌། །རྣལ་འབྱོར་རྒྱུད་ལས་བཤད་པ་ཡིན། །རྣལ་འབྱོར་མ་ཡི་རྒྱུད་དུ་ནི། །གསང་བ་ཤེས་རབ་ཡེ་ཤེས་དང༌། །ཤེས་རབ་ཡེ་ཤེས་ཆེན་པོའོ། །ཞེས་སྔ་མ་སྔ་མའི་སྟེང་ཕྱི་མ་ཕྱི་མ་རྣམས་ལྷག་པར་བསྟན་པས་ཀྱང་དེ་ལྟར་དུ་ངེས་པའི་ཕྱིར་རོ། །དྲུག་པ་ལམ་གྱི་ཁྱད་པར་མི་འདྲ་བ་བཞི་ཡོད་པས་ཀྱང་རྒྱུད་སྡེ་བཞིར་ངེས་པ་ནི། བྱ་བའི་རྒྱུད་ལ་རྗེ་འབངས་ཀྱི་ཚུལ་གྱིས་དངོས་གྲུབ་སྒྲུབ་པ་སྟེ། དམ་ཚིག་ཡེ་ཤེས་རྗེ་འབངས་ཏེ། །རྗེ་ཁོལ་ཉིད་དུ་ཉེ་བར་གནས། །ཞེས་སོ། །སྤྱོད་པའི་རྒྱུད་ལ་