[A:415]སྐོར། སྒྲུབ་ཐབས་ལས་བྱང༌། བསྟོད་བསྐུལ། རབ་གནས། སྦྱིན་སྲེག ཟོར་སོགས་སྒྲུབ་པ་ཆེན་པོའི་ཆ་ལག་ཏུ་ངེས་པར་དགོས་པས་སྨད་ལས་ཀྱི་ཆར་གཏོགས་པ་འགའ་ཞིག་ཀྱང་དེར་ཚང་དགོས་ལ། རྒྱུད་ཀྱི་ལེའུ་བདུན་པ་ནས་བཅུ་གཉིས་པའི་བར་གྱི་སྨད་ལས་དགྲ་བགེགས་སྒྲོལ་བ་མངོན་སྤྱོད་དྲག་པོའི་སྐོར་ནི་སྒྲུབ་ཆེན་གྱི་ལེ་ལག་ཏུ་བྱུང་བའི་དམོད་པ་ཁ་སྦྱོར་དབྱེ་བ་སོགས་མ་ཡིན་པ་མིན་ནའང༌། གཙོ་བོར་སྦས་པ་མིག་འབྱེད་ཀྱི་ལེའུ་གསུམ་པ་མན་ཆད་ཀྱི་སྐོར་དང༌། གཏོར་མའི་ལས་ཚོགས་བཅུ་བདུན་གྱི་ནང་གི་མངོན་སྤྱོད་ཀྱི་སྐོར་སོགས་འཕྲུལ་ཤེས་པར་བྱས་ནས་སྐབས་གང་དང་གང་དུ་དགོས་པ་དེ་དང་དེར་ལེན་པ་ཡིན། གཉིས་པ་ནི། སྒྲུབ་ཕྲིན་སྦྱོར་དངོས་རྗེས་ཚང་ལ་བརྟེན་ནས་རྒྱུད་དང་མན་ངག་ཤོག་དྲིལ་སོགས་སྐབས་ཐོབ་གང་དུ་དགོས་པ་དེ་བསྣན་ནས་ཉམས་སུ་ལེན། གསུམ་པ་ནི། སྦས་པ་མིག་འབྱེད་ཀྱི་སྐོར་ཏེ། དེ་ཡང་རྒྱུད་ལྟར་བྱེད་ན་ལེའུ་དང་པོ་དང་གཉིས་པས་སྟོད་ལས་རྒྱུད་ལེའུ་དྲུག་པ་ཡན་དང་སྦྱར། ལྷག་མས་སྨད་ལས་རྒྱུད་ཀྱི་ལེའུ་བདུན་པ་མན་དང་སྦྱོར། མན་ངག་ལྟར་བྱེད་ན་ཞལ་གདམས་ཤོག་དྲིལ་བྱང་བུ་སོགས་སྟོད་ལས་དང་ཐུན་མོང་གི་ལས་སྒྲུབ་རྣམས་སྨད་ལས་སུ་སྦྱོར། མན་ངག་རང་རྐྱང་དུ་བྱེད་ན་སྨན་སྒྲུབ་དང་ལྷ་སྔགས་དམིགས་པའི་ངེས་པ་བསྟན་པས་སྟོད་ལས། ལེའུ་གསུམ་པ་མན་ཆད་ཀྱི་སྨད་ལས་སུ་སྦྱོར་དགོས་པས་སྡོམ་འདི་ལྟ་བུ་ཤེས་ན་ཆོས་ལུགས་འདི་ལ་ནང་བྱན་ཚུད་པར་མངོན་ནོ། །དེ་ཡང་རྩ་བ་རྒྱུད་ཀྱི་སྐོར། སྡོང་བུ་བྱང་བུའི་སྐོར། སྨིན་བྱེད་དབང་གི་སྐོར། སྒྲུབ་པ་ཕྲིན་ལས་ཀྱི་