[A:571]པའི་མངའ་བདག་རྗེ་བཙུན་ས་སྐྱ་པ་ཡབ་སྲས་ལ་དཔལ་ཀྱེ་རྡོ་རྗེའི་བཀའ་སྲོལ་མི་འདྲ་བ་ཆེན་པོ་བཞི་བབས་པ་ལ། དཔལ་ཀྱེ་རྡོ་རྗེའི་ཆོས་སྐོར་འདི་རྣམས། རྣལ་འབྱོར་མ་རྒྱུད་ཀྱེ་རྡོ་རྗེ། །ཞེས་པའི་དགོངས་དོན་ལྟར་མ་རྒྱུད་དུ་བཀྲལ་བ་དང༌། ཐབས་དང་ཤེས་རབ་གཉིས་མེད་རྒྱུད། །ཅེས་པའི་དགོངས་དོན་གཉིས་མེད་དུ་བཀྲལ་བའི་ལུགས་གཉིས་ལས་ངོར་ཆེན་རྡོ་རྗེ་འཆང་ཆེན་པོ་གཉིས་ཆར་འགལ་མེད་དུ་བཞེད་པས་འདིར་བྱང་ཆུབ་སེམས་དཔའ་རྡོ་རྗེ་སྙིང་པོས། རྣལ་འབྱོར་ཐབས་ཀྱིས་མ་ཡིན་ཞིང༌། །རྣལ་འབྱོར་ཤེས་རབ་གཅིག་པུས་མིན། །ཐབས་དང་ཤེས་རབ་གཉིས་མེད་པའི། །དགེས་རྡོར་འདི་ནི་ཕྱོགས་གཅིག་མིན། །ཞེས་བྱ་བ་ལ་སོགས་པ་རྒྱུ་མཚན་དུ་མའི་སྒོ་ནས་ཐབས་དང་ཤེས་རབ་གཉིས་སུ་མེད་པའི་རྒྱུད་དུ་བཞེད་པའི་ནང་ནས་མན་ངག་ལུགས་ནི་འོག་གསེར་ཆོས་སྐབས་སུ་འབྱུང་ཞིང༌། འདིར་རྣལ་འབྱོར་དབང་ཕྱུག་བིརྺ་པ་དང༌། ཡེ་ཤེས་ཀྱི་མཁའ་འགྲོ་མ་གཉིས་ཀྱིས་དངོས་སུ་བྱིན་གྱིས་བརླབས་པའི་གྲུབ་པའི་སློབ་དཔོན་ཆེན་པོ་ཌོམྦི་ཧེ་རུ་ཀའི་ཞལ་སྔ་ནས་ལེགས་པར་བཀྲལ་བའི་དཔལ་ཀྱེ་རྡོ་རྗེ་འགྲེལ་པ་ལུགས་སམ། ཌོམྦི་ལུགས་སུ་གྲགས་པ་ལྷ་དགུའི་རས་བྲིས་ཀྱི་དཀྱིལ་འཁོར་ཆེན་པོར་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱིས་མཛད་པའི་སྒྲུབ་དཀྱིལ་ཌོམྦི་མཛེས་རྒྱན་གྱི་སྟེང་ནས་དབང་བཞི་རྫོགས་པར་ཐོབ་པའི་བརྒྱུད་པ་ནི། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང༌། རྗེ་བཙུན་རྡོ་རྗེ་བདག་མེད་མ། རྣལ་འབྱོར་གྱི་དབང་ཕྱུག་བི་རཱུ་པ། གྲུབ་པའི་སློབ་དཔོན་ཌོམྦི་ཧེ་རུ་ཀཨ་ལ་ལ་བཛྲ། ནགས་ཁྲོད་པ། གརྦྷ་རི་