[A:626]ཤིང་རྒྱས་པ་ལམ་གྱི་སྔོན་འགྲོའི་ཁྲིད་ཡིག་སྣང་གསུམ་མཛེས་པར་བྱེད་པའི་རྒྱན་ཉིད་གཞིར་བྱས་འཁྲིད་ཚུལ་གྱི་རྣམ་གཞག་གི་རྒྱས་འགེབས་དང་བརྒྱུད་པའི་ཕྱག་བཞེད་ཀྱིས་ལེགས་པར་བརྒྱན་ཏེ་ཉམས་ཁྲིད་སྨིན་རྒྱས་སུ་སྩལ་ནས། སྙན་བརྒྱུད་བཞིའི་སྤྲོས་པའི་སྒྲོ་འདོགས་གཅོད་པའི་སྐབས་དབང་གི་ཆུ་བོ་མ་ནུབ་པ། བྱིན་རླབས་ཀྱི་བརྒྱུད་པ་མ་ཉམས་པ། གདམས་ངག་གི་སརྒ་མ་ལོག་པ། མོས་གུས་ཀྱི་བསམ་པ་ཚིམ་པ་སྟེ་བཞི་དང་ལྡན་པའི་འཆད་ཚུལ་གྱི་སྒོ་ནས་བཤད་པའི་དང་པོ་ནི་རྒྱུ་ལམ་འབྲས་གསུམ་གྱི་དབང་གི་ཆུ་བོ་མ་ནུབ་པ། གཉིས་པ་ནི་རྡོ་རྗེ་འཆང་ནས་རྩ་བའི་བླ་མའི་བར་དུ་ཉམས་སུ་བླངས་པ་མྱོང་བ་བྱིན་གྱིས་བརླབས་པ་གྲུབ་པའི་མཐའ་སྟེ་བརྒྱུད་པ་མ་ཉམས་པ། གསུམ་པ་ནི་གདམས་ངག་གི་སརྒ་ཞེས་པ་རྒྱུད་དང་མན་ངག་གི་གོ་རིམ་མ་འཆོལ་བ། བཞི་པ་མོས་གུས་ཀྱི་བསམ་པ་ཚིམ་པ་རྟོགས་པ་རྒྱུད་ལ་སྐྱེས་པས་བླ་མ་ལྷ་དང་གདམས་ངག་ཏུ་བཅས་པ་ལ་གཞན་རྐྱེན་གྱིས་མི་འཕྲོགས་པའི་མོས་གུས་སྐྱེས་པ་སྟེ་བཞི་ཡིན་ལ། དེ་ཡང་སྙན་བརྒྱུད་གསུམ་པའི་གོ་རིམ་མ་འཆོལ་བ་དཔོན་སློབ་ཀྱི་འབྲེལ་པ་མ་བརྟགས་པར་དབང་མི་བསྐུར། དབང་མ་བསྐུར་བར་གདམས་ངག་མི་འཆད། དེ་མ་བཤད་པར་གཞུང་མི་སྦྱིན། དེ་མ་སྦྱིན་པར་སྒྲུབ་པའི་ལུང་དང་གསང་བཅུའི་རྒྱས་མི་གདབ་པ་སོགས་འཁྲུལ་པའི་དྲི་མ་ཕྲ་མོ་ཙམ་ཡང་མེད་པའི་ཕྱག་ལེན་རྣམ་པར་དག་པ་ཡིན་ལ། སྤྱིར་འཁྲིད་ཚུལ་ནི། བརྟག་གཉིས་ལས། དང་པོར་གསོ་སྦྱོང་སྦྱིན་པར་བྱ། །དེ་ནས་བསླབ་པའི་གནས་བཅུ་སྦྱིན། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་